निमोणे (प्रतिनिधी) : शिरुर-हवेलीचे आमदार अशोक पवार यांची पुणे जिल्हा मध्यवर्ती सहकारी बँकेच्या संचालकपदी विक्रमी मतांनी निवड झाल्याबद्दल निमोणे ग्रामस्थांच्या वतीने 26 जानेवारी रोजी त्यांच्या सत्कार समारंभाचे आयोजन करण्यात आले होते. यावेळी कार्यक्रमा दरम्यान येथील 33.11 के.व्ही. क्षमतेचे वीज उपकेंद्र काही रोहित्रांची कमतरता असल्याने पूर्ण क्षमतेने सर्व भागाला वीज पुरवठा होण्यास अडचण निर्माण होत आहे. त्यामुळे रोहित्रांची संख्या वाढवावी अशी शेतकऱ्यांनी मागणी केली.
या कार्यक्रमात शिरुर तालुका राष्ट्रवादी काँग्रेसचे अध्यक्ष रविंद्र काळे यांनी आपल्या भाषणात ग्रामस्थांचे म्हणणे आमदार पवार यांच्या समोर मांडले. त्यामुळे याची दखल घेत आमदारांनी महावितरणच्या संबंधित वरिष्ठ अधिकाऱ्यांना फोन लावला आणि ग्रामस्थांच्या मागणी नुसार 15 रोहित्रांची मागणी केली. त्यानंतर केवळ 13 दिवसातच निमोणे गावासाठी 27 रोहित्रांना मंजुरी मिळाल्याचे आमदार अशोक पवार यांनी फोनद्वारे ग्रामस्थांना कळवले आहे.
या 27 रोहित्रांमुळे गावच्या काही भागातील शेतीला पूर्ण दाबाने वीज मिळण्याचा प्रश्न काही अंशी मार्गी लागला असुन त्यामुळे निमोणे परिसरात शेतकऱ्यांनी समाधान व्यक्त करत आमदारांचे आभार मानले आहेत.
