पुणे – पुणे शहर परिसरातील पावसामुळे विस्कळीत झालेले जनजीवन पूर्वपदावर आणावे. याबरोबरच आपत्ती व्यवस्थापन कक्षाने सज्ज रहावे अशा सूचना पालकमंत्री अजित पवार यांनी पुणे जिल्हा व महापालिका प्रशासनाला दिल्या आहेत.
पुणे शहर आणि परिसरात शनिवारी सायंकाळी जोरदार पाऊस झाला. यात शिवाजीनगर, लोहगाव भागांत सर्वाधिक पावसाची नोंद झाली आहे. यावर पवार यांनी जिल्हाधिकारी डॉ. सुहास दिवसे व महापालिका आयुक्त राजेंद्र भोसले आणि दूरध्वनीवरुन सविस्तर माहिती घेतली.
कमी वेळेत जास्त पाऊस पडल्यामुळे काही ठिकाणी पाणी साचले आहे, त्याचा जनजीवनावर परिणाम झाला आहे. तरी प्रशासनाच्यावतीने तातडीने उपाययोजना करण्याच्या तसेच पावसात अडकलेल्या नागरिकांना मदत करुन वाहतक सुरळीत करण्याच्या सूचना प्रशासनाला दिल्या.
येत्या पाच दिवसांत राज्यात अनेक ठिकाणी मोठा पाऊस होण्याची शक्यता हवामानशास्त्र विभागाने वर्तवली आहे. त्यामुळे नागरिकांनी काळजी घ्यावी. आपत्ती व्यवस्थापन कक्षाला सतर्क रहावे, अशा सूचनाही पवार यांनी दिल्या आहेत.
