पुणे : सराफी पेढीच्या मालकाला पिस्तुलाचा धाक दाखवून दागिन्यांची लूट केल्याची घटना बी. टी. कवडे रस्त्यावर एका सराफी पेढीत रविवारी रात्री घडली.
घोरपडीतील बी. टी. कवडे रस्त्यावर अरिहंत ज्वेलर्स सराफी पेढी आहे. रविवारी रात्री साडेआठच्या सुमारास दुचाकीवरुन तीन चोरटे सराफी पेढीत शिरले. सराफी पेढीच्या मालकाला पिस्तुलाचा धाक दाखविला. अचानक शिरलेल्या तिघांनी पिस्तुलाचा धाक दाखविल्याने सराफी पेढीचे मालक घाबरले.
पुढे चोरट्यांनी त्यांच्या डोळ्यावर पेपर स्प्रे फवारला. त्यानंतर कोयत्याचा दांड्याने मारहाण करुन सराफी पेढीतील दागिने लुटून चोरटे दुचाकीवरुन भरधाव वेगात पसार झाले.
सराफी पेढीच्या मालकाने या घटनेची माहिती वानवडी पोलिसांना दिली. पोलिसांनी घटनास्थळी धाव घेतली. पसार झालेल्या चोरट्यांना पकडण्यासाठी त्वरीत नाकाबंदी करण्याचे आदेश वरिष्ठ पोलीस अधिकाऱ्यांनी दिली. सराफी पेढीवर दरोडा टाकल्याची माहिती मिळताच गुन्हे शाखेच्या पथकाने घटनास्थळी भेट देऊन तपास सुरू केला.
