पुणे : पहलगाम येथील दहशतवादी हल्ल्यात मृत्युमुखी पडलेल्या कौस्तुभ गनबोटे आणि संतोष जगदाळे यांच्या कुटुंबीयांची भेट घेत मुख्यमंत्री देवेंद्र फडणवीस यांनी सांत्वन केले.
आतापर्यंत ज्याप्रमाणे आपण खंबीर राहिले त्याचप्रमाणेच यापुढेही खंबीर राहावे, राज्य शासन आपल्या दुःखात सहभागी असून आपल्या पाठीशी आहे, अशा शब्दांत मुख्यमंत्री फडणवीस यांनी दोन्ही कुटुंबियांना धीर दिला.
यावेळी गनबोटे यांच्या गंगानगर कोंढवा येथील घरी नगरविकास राज्यमंत्री माधुरी मिसाळ, आमदार योगेश टिळेकर, सुनील कांबळे, माजी मंत्री हर्षवर्धन पाटील, कौस्तुभ गनबोटे यांच्या पत्नी संगीता गनबोटे, मुलगा तुषार, कुणाल, स्नुषा कोमल गनबोटे उपस्थित होते.
जगदाळे यांच्या कर्वेनगर येथील निवासस्थानी राज्यमंत्री माधुरी मिसाळ, आमदार भीमराव तापकीर, सुनील कांबळे, स्व. संतोष जगदाळे यांच्या पत्नी प्रगती जगदाळे, मुलगी आसावरी जगदाळे आदी कुटुंबातील सदस्य उपस्थित होते. यावेळी दोन्ही कुटुंबीयांनी पहलगाम येथे घडलेल्या घटनेबाबत सविस्तर माहिती सांगितली.
