पुणे – भाजपा महायुतीचे उमेदवार चंद्रकांत पाटील यांच्या प्रचारार्थ कोथरूडमधील प्रभाग क्रमांक १३ मध्ये आयोजित बाइक रॅलीला उत्स्फूर्त प्रतिसाद मिळाला. ठिकठिकाणी ‘जय श्रीराम’च्या घोषात रॅलीचे स्वागत करण्यात आले. रॅलीत पारंपरिक वेषात महिला सहभागी झाल्या होत्या. या वेळी क्रांतिगुरू लहुजी महासंघ आणि महाराष्ट्र राज्य सुशिक्षित बेरोजगार स्थापत्य अभियंता संघटनेने चंद्रकांत पाटील यांना आपला पाठिंबा जाहीर केला.
नागरिकांनी रस्त्याच्या दुतर्फा गर्दी करीत ‘जय श्रीराम’च्या घोषणेसह जल्लोष केल्याने रॅलीत उत्साह संचारला होता. प्रभागातील विविध मंडळांकडूनही पाटील यांचे जंगी स्वागत करण्यात आले. एरंडवण्याचे ग्रामदैवत भैरवनाथांचे दर्शन घेऊन रॅलीची सुरुवात झाली.
भाजपाचे माजी शहर अध्यक्ष जगदीश मुळीक, पुणे शहर सरचिटणीस पुनीत जोशी, प्रदेश प्रवक्ते संदीप खर्डेकर, माजी नगरसेवक दीपक पोटे, जयंत भावे, नगरसेविका मंजूश्री खर्डेकर, माधुरी सहस्रबुद्धे, युवा मोर्चा अध्यक्ष अमित तोरडमल, प्रभाग अध्यक्षा ॲड. प्राची बगाटे, अग्रसेन खिलारे, अमोल डांगे, अनुराधा एडके, गिरीश खत्री, मंदार बलकवडे यांच्यासह भाजप महायुतीचे पदाधिकारी याप्रसंगी उपस्थित होते.
