पुणे – लोकसभा निवडणूक प्रचारादरम्यान भाजपच्या कार्यकर्त्यांकडून मतदारांना प्रलोभन दाखवले जात असल्याचा आरोप करत काँग्रेसचे उमेदवार रवींद्र धंगेकर यांनी सहकारनगर पोलीस ठाण्यासमोर ठिय्या आंदोलन केले होते. यावेळी धंगेकर हे स्टंटबाजी करत असल्याचा आरोप करत भाजप पदाधिकाऱ्यांनी त्यांना विरोध केला.
या प्रकरणी धंगेकर यांच्यासह सुमारे 100 कार्यकर्त्यांवर पोलिसांनी गुन्हा दाखल केला होता. यानंतर आता भाजपच्या माजी नगरसेवकांसह 20 ते 25 कार्यकर्त्यांवर सहकारनगर पोलीस ठाण्यात गुन्हा दाखल करण्यात आला आहे.
याबाबत पोलीस कर्मचारी अभिजीत वालगुडे यांनी तक्रार दाखल केली आहे. त्यानुसार भाजपचे माजी नगरसेवक राजेंद्र शिळीमकर, सुभाष जगताप, महेश वाबळे अन्य कार्यकर्त्यांवर गुन्हा दाखल करण्यात आलेला आहे. पोलिसांनी दिलेल्या माहितीनुसार, “संबंधित आरोपींनी जमावबंदी आदेश डावलले. त्यांनी निवडणूक आचारसंहितेचा भंग केला.
बेकायदेशीर जमाव जमवून सहकारनगर पोलीस स्टेशनसमोर घोषणाबाजी केली. त्यानुसार आरोपींविरुद्ध कायदेशीर कारवाई करण्यात आली आहे. अधिक तपास सहायक पोलीस निरीक्षक पवार करत आहेत.
