पुणे : कोरेगाव पार्क भागात एका खासगी कंपनीतील रोखपालाने दोन कोटी रुपयांचा अपहार केल्याप्रकरणी गु्न्हा दाखल करण्यात आला आहे. याबाबत खासगी कंपनीचे मालक जिनेंद्र दिलीप दोशी (वय ३८, रा. कोरेगाव पार्क) यांनी कोरेगाव पार्क पोलिसांत फिर्याद दिली आहे.
पोलिसांनी दिलेल्या माहितीनुसार, दोशी यांची जेनसिस इव्हेंट मॅनेंजमेंट कंपनी आहे. रोखपालाने दोशी आणि त्यांच्या भागीदारांना विश्वासात घेऊन कंपनीतील सर्व आर्थिक व्यवहार ताब्यात घेतले. कर भरण्याबाबतच्या बनावट नोंदी करून दोन कोटी रुपयांचा वेळोवेळी अपहार केला.
संबंधित रक्कम रोखपालाने स्वत:च्या बँक खात्यात, तसेच नातेवाइकांच्या खात्यात हस्तांतरित केली. लेखापरीक्षणात नुकताच हा प्रकार उघडकीस आल्यानंतर दोशी यांनी तक्रार दिली. गुन्हे शाखेचे पोलीस निरीक्षक चेतन मोरे तपास करत आहेत.