Terrorist Hamza Burhan : १४ फेब्रुवारी २०१९ रोजी जम्मू-काश्मीरमधील पुलवामा येथे झालेल्या भीषण दहशतवादी हल्ल्याशी संबंधित मोठी माहिती समोर आली आहे. पुलवामा हल्ल्याचा कथित सूत्रधार आणि जैश-ए-मोहम्मदशी संबंधित दहशतवादी ‘हमजा बुरहान’ याचा पाकिस्तानव्याप्त काश्मीरमध्ये अज्ञात हल्लेखोरांनी गोळ्या झाडून खात्मा केल्याची माहिती सूत्रांकडून मिळत आहे. ही घटना मुझफ्फराबाद परिसरात घडल्याचे सांगितले जात आहे. सूत्रांच्या माहितीनुसार, हमजा बुरहान हा त्या वेळी आपल्या कार्यालयात उपस्थित होता. त्याच दरम्यान काही अज्ञात व्यक्तींनी कार्यालयात घुसून त्याच्यावर जवळून गोळीबार केला. या हल्ल्यात तो गंभीर जखमी झाला आणि त्याचा जागीच मृत्यू झाला. हल्लेखोर घटनास्थळावरून पसार झाले असून, या प्रकरणाबाबत अद्याप अधिकृतरीत्या कोणतीही स्पष्ट माहिती समोर आलेली नाही. हमजा बुरहान (Hamza Burhan) हा २०१९ मधील पुलवामा दहशतवादी हल्ल्याशी संबंधित प्रमुख सूत्रधारांपैकी एक मानला जात होता. तो पाकिस्तानात शिक्षक असल्याचे भासवत होता, मात्र प्रत्यक्षात दहशतवादी कारवायांमध्ये सक्रिय सहभाग घेत असल्याचा आरोप भारतीय सुरक्षा यंत्रणांकडून करण्यात आला होता. हमजा बुरहान हा पाकिस्तानव्याप्त काश्मीरमध्ये सक्रिय असलेल्या विविध दहशतवादी संघटनांना प्रशिक्षण देण्याचे काम करत होता. तसेच सीमावर्ती भागातून घुसखोरी घडवून आणणे, दहशतवाद्यांना लॉजिस्टिक मदत पुरवणे आणि नव्या भरतींना प्रशिक्षण देणे, अशा कारवायांमध्ये त्याची महत्त्वाची भूमिका होती. दरम्यान, १४ फेब्रुवारी २०१९ रोजी पुलवामा जिल्ह्यात राष्ट्रीय महामार्गावर भारतीय सुरक्षा दलांवर झालेला आत्मघाती हल्ला संपूर्ण देशाला हादरवून सोडणारा ठरला होता. दुपारी सुमारे ३.१५ वाजण्याच्या सुमारास जैश-ए-मोहम्मदशी संबंधित दहशतवादी आदिल अहमद दार याने स्फोटकांनी भरलेली एसयूव्ही सीआरपीएफ जवानांच्या ताफ्यातील बसवर आदळवली होती. या भीषण स्फोटात ४० सीआरपीएफ जवान शहीद झाले होते, तर अनेक जवान गंभीर जखमी झाले होते. १९८९ नंतर जम्मू-काश्मीरमध्ये सुरक्षा दलांवर झालेला हा सर्वात मोठा आणि प्राणघातक दहशतवादी हल्ला मानला जातो. या घटनेने संपूर्ण देश हादरून गेला होता.