नवी दिल्ली : पंतप्रधान नरेंद्र मोदी यांचे ट्विटर हँडल रविवारी काही वेळासाठी हॅक करण्यात आल्याची धक्कादायक घटना घडली आहे. पंतप्रधानांचे ट्विटर हँडल काही वेळासाठी हॅक करण्यात आले होते. ट्विटर अकाऊंट काही वेळाने पुन्हा सुरळीत करण्यात आले. मात्र अकाऊंट हॅक केल्यानंतर काही वेळातच हॅकर्सनी क्रिप्टोकरन्सीला प्रोत्साहन देणारे एक ट्वीट केले होते. नंतर हे ट्वीट डिलीट करण्यात आले.
पंतप्रधान कार्यालयाने ट्वीट करत यासंबंधी माहिती दिली आहे. “‘पंतप्रधानांचे ट्विटर हँडल @narendramodi सोबत छे़डछाड करण्यात आली होती. ट्विटरला याची माहिती देण्यात आली असून अकाऊंट तात्काळ पुन्हा सुरक्षित करण्यात आलं आहे. छेडछाड करण्यात आलेल्या काळात करण्यात आलेल्या ट्वीटकडे दुर्लक्ष करा,” असे पंतप्रधान कार्यालयाने सांगितले आहे.
The Twitter handle of PM @narendramodi was very briefly compromised. The matter was escalated to Twitter and the account has been immediately secured.
In the brief period that the account was compromised, any Tweet shared must be ignored.
— PMO India (@PMOIndia) December 11, 2021
अकाऊंट पुन्हा सुरक्षित करण्याआधी पंतप्रधान मोदींच्या ट्विटर अकाऊंटवरुन करण्यात आलेल्या ट्वीटमध्ये बिटकॉईनला मान्यता देण्यात आल्याचं सांगण्यात आलं होतं. “भारताने बिटकॉईनला कायदेशीर मान्यता दिली आहे. भारताने ५०० बिटकॉईन खरेदी केली असून देशातील लोकांना वाटत आहे,” असे या ट्वीटमध्ये सांगण्यात आले होते.
याआधी सप्टेंबर २०२० मध्ये पंतप्रधान नरेंद्र मोदींची खासगी वेबसाईट हॅक करण्यात आली होती. यावेळी क्रिप्टोकरन्सीसाठी विनंती करणारे ट्वीट पोस्ट करण्यात आले होते. narendramodi_in या हँडलवर एकामागोमाग करण्यात आलेल्या ट्वीट्समध्ये पंतप्रधान मदत निधीसाठी पुढाकार घेण्याचे आवाहन करताना भारताने आता क्रिप्टोकरन्सीला सुरुवात केली असल्याचे सांगण्यात आले होते. काही मिनिटांनी हे ट्विटर अकाऊंट हॅक करण्यात आल्याचं ट्वीट हॅकरने केलं होतं. नंतर हे ट्वीट्स डिलीट करण्यात आले होते.
