पुणे – मराठी चित्रपटसृष्टीतील दिग्दर्शक, सुपरस्टार आणि दिग्गज कलाकार यांचा सहभाग असलेल्या आणि पुनीत बालन ग्रुप तर्फे आयोजित पहिल्या पुनीत बालन सेलिब्रिटी लीग क्रिकेट स्पर्धेत प्रतापगड वॉरीयर्स संघाने सिंहगड स्ट्रायकर्स संघाचा 8 धावांनी पराभव करत उद्‌घाटनाचा दिवस गाजवला.
लिजंडस्‌ क्रिकेट मैदान, मुंढवा येथे आजपासून सुरू झालेल्या या स्पर्धेचे उद्‌घाटन पुणे शहराचे महापौर मुरलीधर मोहोळ, माणिकचंद ऑक्‍सिरीचच्या कार्यकारी संचालक जान्हवी धारीवाल, शोभा धारीवाल, पुनीत बालन ग्रुपचे कार्यकारी संचालक व प्रतापगड वॉरीयर्स संघाचा कर्णधार पुनीत बालन, महाराष्ट्राचा रणजीपटू राहुल त्रिपाठी, ज्येष्ठ दिग्दर्शक महेश मांजरेकर, सिंहगड स्ट्रायकर्स संघाचा कर्णधार सिद्धार्थ जाधव, उपेंद्र लिमये, लिजंड्‌स स्पोर्टस क्‍लबचे संदीपदादा कोद्रे आदी उपस्थित होते.
आपल्या उद्‌घाटनाच्या भाषणामध्ये पुण्याचे महापौर मुरलीधर मोहोळ यांनी सांगितले की, नवीन वर्षाची सुरुवात अशी अनोख्या आणि उत्साहपूर्ण क्रिकेट स्पर्धेने झाली आहे. आतापर्यंत विविध माध्यमांद्वारे मराठी चित्रपटसृष्टीतील हे सर्वच कलावंत आपले मनोरंजन करत आहेत. आज आता या क्रिकेट स्पर्धेद्धारे ते आपले मनोरंजन करणार आहेत. करोनाचे सर्व नियम पाळून ही स्पर्धा पुण्यामध्ये आयोजित केल्यासाठी तसेच संपूर्ण मराठी चित्रपटसृष्टी पुण्यामध्ये आणल्याबद्दल मी पुनीत बालन ग्रुपचे आभार मानतो.
विज्ञान माने याने केलेल्या 47 धावांच्या खेळीच्या जोरावर प्रतापगड वॉरीयर्स संघाने सिंहगड स्ट्रायकर्स संघाचा 8 गडी राखून पराभव केला. पहिल्यांदा फलंदाजी करताना प्रतापगड वॉरीयर्स संघाने 10 षटकामध्ये 2 गडी गमावून 96 धावांचे आव्हान उभे केले. या आव्हानाचा पाठलाग करताना सिंहगड स्ट्रायकर्सचा डाव 10 षटकामध्ये 5 गडी गमावून 88 धावांवर मर्यादित राहिला.
संक्षिप्त धावफलक – गटसाखळी फेरी ः प्रतापगड वॉरीयर्स ः 10 षटकात 2 बाद 96 धावा. (विज्ञान माने नाबाद 47, सिद्धांत मुळे 24, विजय आंदाळकर नाबाद 14, राहुल गोरे 1-12) वि. वि. सिंहगड स्ट्रायकर्स ः 10 षटकात 5 बाद 88 धावा. (तेजस नेरूरकर 31, सिद्धार्थ जाधव 15, नुपूर दुरवाडकर 12, सागर पाठक 1-3, गौरव देशमुख 1-9). सामनावीर ः विज्ञान माने.
