Prashant Koratkar । इतिहास अभ्यासक इंद्रजीत सावंत धमकी प्रकरणी कोल्हापूर आणि नागपूर पोलिसांच्या पथकाडून फरार प्रशांत कोरटकर यांचा शोध सुरु आहे. मात्र देवदर्शन आणि पर्यटन करत प्रशांत कोरटकर पोलिसांना गुंगारा देण्यात यशस्वी झाले आहेत. समोर आलेल्या माहितीनुसार प्रशांत कोरटकरांकडून सध्या अटकपूर्व जामिनासाठी प्रयत्न सुरु असल्याचे सांगण्यात येत आहे.
कोल्हापूर येथील इतिहास अभ्यासक इंद्रजीत सावंत यांना धमकीचा फोन आला होता. या धमकीच्या फोनमध्ये छत्रपती शिवाजी महाराज, छत्रपती संभाजी महाराज यांच्यासंदर्भात आक्षेपार्ह भाषा वापरण्यात आली होती. इंद्रजीत सावंत यांनी धमकी देणाऱ्या व्यक्तीचे नाव प्रशांत कोरटकर असल्याचा दावा केला होता. यानंतर त्यांनी कोल्हापूर पोलिसात तक्रार दिली होती. ही घटना उघडकीस आली तेव्हा प्रशांत कोरटकरांनी तो आवाज आपला नसल्याचे म्हटले होते. मात्र असा दावा करून कोरटकर फरार झाले होते.
सोशल मीडियावर ऑडिओ क्लिप व्हायरल Prashant Koratkar ।
24 फेब्रुवारीच्या रात्री प्रशांत कोरटकर नावाने इंद्रजीत सावंत यांना धमकीला फोन आला. सावंत यांनी 25 फेब्रुवारीच्या सकाळी सोशल मीडियावर पोस्ट शेअर करत आपल्याला प्रशांत कोरटकरनं धमकी दिल्याचा दावा केला. यासोबत ऑडिओ क्लीप देखील शेअर केली. सोशल मीडियावर ऑडिओ क्लिप व्हायरल होताच प्रशांत कोरटकर यांना राज्यभरातून फोन यायला सुरुवात झाली. सकाळी मुलीला परीक्षा केंद्रावर सोडायला जात असताना प्रशांत कोरटकर यांनी मीडियाशी बोलून तो आवाज आपला नसल्याचे स्पष्ट केले. त्यानंतर वरीष्ठ पोलीस अधिकाऱ्यांना फोन करून आपल्याला धमकी येत असल्याचे सांगत सुरक्षेची मागणी केली.खबरदारी म्हणून नागपूर पोलिसांनी प्रशांत कोरटकर यांच्या मनीषनगर येथील घरावर पोलिसांचा बंदोबस्त लावला.
प्रशांत कोरटकरांचा फोन 25 तारखेपासून बंद Prashant Koratkar ।
25 फेब्रुवारील मुलीला परीक्षा केंद्रावर सोडायला गेल्यानंतर प्रशांत कोरटकर घरी परतले नाहीत. 25 फेब्रुवारीच्या दुपारनंतर त्यांनी आपला फोन बंद केला. प्रशांत कोरटकर हे शिवनी, बालाघाट मार्गे मध्यप्रदेशला गेले. यानंतर त्यांनी पुढे देवदर्शन केल्याची माहिती समोर आली आहे.
सध्या प्रशांत कोरटकर यांचे फोन बंद असून ते एका ठिकाणी खूप वेळ मुक्काम करत नाहीत. सतत प्रवास करत असून या प्रवासात ते देवदर्शन व पर्यटन करत पोलिसांना गुंगारा देत आहेत. सध्या नागपूर पोलिसांची दोन पथकं आणि कोल्हापूर पोलिसांचे एक पथक अशी तीन पथकं प्रशांत कोरटकर यांचा शोध घेत आहे. प्रशांत कोरटकर हे अटकपूर्व जामिनासाठी प्रयत्न करत असल्याची माहितीसमोर आली आहे.
