‘पृथ्वीवर परतल्यानंतर भारतात…’, पंतप्रधान मोदींनी सुनीता विल्यम्स यांना लिहिले खास पत्र

PM Modi’s Letter To Sunita Williams | मागील जवळपास 9 महिन्यांपासून आंतरराष्ट्रीय अंतराळ स्थानकावर अडकलेल्या भारतीय वंशाच्या अंतराळवीर सुनीता विल्यम्स आणि त्यांचे सहकारी विल्मोर हे लवकरच पृथ्वीवर परतणार आहेत. अवघ्या 8 दिवसांच्या मोहिमेवर गेलेले हे दोन्ही अंतराळवीर अनेक महिन्यांपासून अंतराळात अडकले आहेत. दोघेही लवकरच SpaceX च्या अंतराळयानातून स्वगृही परततील. या निमित्ताने आता भारताचे पंतप्रधान नरेंद्र मोदी यांनी सुनीता विल्यम्स यांना पत्र लिहिले आहे.

पंतप्रधान मोदींनी विल्यम्स यांना लिहिलेले हे पत्र केंद्रीय मंत्री डॉ. जितेंद्र सिंह यांनी सोशल मीडियावर शेअर केले आहे. या पत्रामध्ये पंतप्रधानांनी विल्यम्स यांचा उल्लेख करत 1.4 अब्ज भारतीयांना तुमचा अभिमान असल्याचे म्हटले आहे. तसेच, जुन्या भेटीचा देखील यात उल्लेख करण्यात आला आहे. पृथ्वीवर परतल्यानंतर भारतात स्वागत करण्यासाठी उत्सुक असल्याचेही त्यांनी पत्रात लिहिले.

As the whole world waits, with abated breath, for the safe return of Sunita Williams, this is how PM Sh @narendramodi expressed his concern for this daughter of India.
“Even though you are thousands of miles away, you remain close to our hearts,” says PM Sh Narendra Modi’s… pic.twitter.com/MpsEyxAOU9

— Dr Jitendra Singh (@DrJitendraSingh) March 18, 2025

सुनीता विल्यम्स यांना लिहिलेल्या पत्रात मोदी काय म्हणाले?

पंतप्रधान मोदींनी पत्रात लिहिले की, मी तुम्हाला भारतातील जनतेच्या वतीने शुभेच्छा पाठवतो. आज एका कार्यक्रमात माझी प्रसिद्ध अंतराळवीर माईक मसीमिनो यांची भेट झाली. आमच्या संभाषणादरम्यान तुमच्या उल्लेख आला. आम्ही तुमच्याबद्दल व तुमच्या कार्याबद्दल असलेल्या अभिमानाबद्दल चर्चा केली. त्या चर्चेनंतर मी पत्र लिहिण्यापासून स्वतःला रोखू शकलो नाही.

‘जेव्हा मी अमेरिकेला भेटी दिली, त्यावेळी ट्रम्प आणि बायडेन यांच्याकडे तुमच्या प्रकृतीची विचारपूस केली. 1.4 अब्ज भारतीयांना तुमच्या यशाचा नेहमीच अभिमान वाटला आहे. अलीकडील घडामोडींनी पुन्हा एकदा तुमची प्रेरणादायी जिद्द आणि चिकाटी सिद्ध केली.’

‘तुम्ही हजारो मैल दूर असलात तरी आमच्या हृदयाच्या जवळ आहात. भारतातील लोक तुमच्या उत्तम आरोग्यासाठी आणि मोहिमेमध्ये यश मिळवावे यासाठी प्रार्थना करत आहेत.’

‘बॉनी पंड्या तुमच्या परतीच्या प्रतीक्षेत असतील, आणि मला खात्री आहे की स्वर्गीय दीपकभाईंचे आशिर्वाद तुमच्यासोबत आहेत. 2016 मध्ये अमेरिकेला दिलेल्या भेटीदरम्यान तुमची आणि दीपकभाई यांची भेट झाल्याचे मला अजूनही आठवते.’

‘तुम्ही परतल्यानंतर आम्ही भारतात तुमच्या भेटीसाठी उत्सुक आहोत. भारताला आपल्या एका कन्येचे स्वागत करण्याचा आनंद होईल. तुम्हाला आणि बॅरी विल्मोर यांना सुरक्षित परतीच्या शुभेच्छा.’