Sheikh Tamim Bin Hamad Al-Thani | कतारचे अमीर शेख तमीम बिन हमद अल थानी यांचे पंतप्रधान नरेंद्र मोदी यांनी सोमवारी दिल्लीच्या इंदिरा गांधी एअरपोर्टवर स्वागत केले. विशेष म्हणजे पंतप्रधान नरेंद्र मोदी यांनी प्रोटोकॉल तोडत त्यांचे स्वागत केले आहे. परदेशी राष्ट्राध्यक्षांच्या स्वागतासाठी स्वत: मोदी एअरपोर्टला फार कमी वेळेस जातात. परंतु भारत आणि कतार यांच्यातील संबंध मजबूत करण्यासाठी मोदींकडून प्रयत्न केले जात आहे.
कतारचे अमीर अल थानी २ दिवसीय भारत दौऱ्यावर असून ते पंतप्रधान नरेंद्र मोदींसोबत द्विपक्षीय चर्चा करतील. तसेच दोन्ही देशांमध्ये महत्त्वाचे करार समंत केले जातील. मंगळवारी सकाळी कतारचे अमीर अल थानी यांचे राष्ट्रपती भवनच्या आवारात औपचारिक स्वागत केले जाईल, त्यानंतर ‘हैदराबाद हाऊस’ मध्ये पंतप्रधान मोदी यांच्याशी त्यांची बैठक होईल. कतारचे अमीर राष्ट्रपती द्रौपदी मुर्मू यांचीही भेट घेणार आहेत.
मैत्री, विश्वास आणि परस्पर सन्मानांवर आधारित भारत आणि कतार यांचे सखोल ऐतिहासिक संबंध आहेत. अलिकडच्या वर्षांत दोन देशांमधील व्यापार, गुंतवणूक, ऊर्जा, तंत्रज्ञान, संस्कृती यासह विविध क्षेत्रातील संबंध सतत मजबूत केले गेले आहेत.
Went to the airport to welcome my brother, Amir of Qatar H.H. Sheikh Tamim Bin Hamad Al Thani. Wishing him a fruitful stay in India and looking forward to our meeting tomorrow.@TamimBinHamad pic.twitter.com/seReF2N26V
— Narendra Modi (@narendramodi) February 17, 2025
दुसऱ्यांदा भारत दौऱ्यावर
पंतप्रधान मोदी यांच्या आमंत्रणावरून अमीर अल थानी दुसऱ्यांदा भारत दौऱ्यावर आले आहेत. याआधी ते २०१५ साली दिल्ली दौऱ्यावर आले होते. यावेळीही कतारचे अमीर अल थानी यांच्या दौऱ्यावर महत्त्वाच्या करारावर शिक्कामोर्तब होऊ शकते.
कोण आहेत अमीर शेख तमीम बिन अल थानी?
शेख तमीम बिन अल थानी यांचे वडील शेख हमद बिन खलिफा अल थानी यांच्यानंतर २५ जून २०१३ साली कतारचे अमीर बनले होते. ब्रिटनमध्ये शिक्षण पूर्ण करून तमीम बिन हमद यांनी कतार सैन्यात त्यांची सेवा दिली. ब्रिटनमधून परतल्यानंतर तमीम यांना २००३ साली क्राऊन प्रिंस बनवले होते. त्यानंतर २००९ साली त्यांना सैन्यात डिप्टी कमांडर इन चीफचं पद मिळाले.
खेळांमध्ये विशेष स्वारस्य असलेल्या तमीम यांना नवी ओळख जागतिक स्तरावर २००६ च्या कतारमध्ये झालेल्या एशियन गेम्सच्या यशस्वी आयोजनामुळे मिळाली होती. त्यांच्या नेतृत्वात २०२२ साली फिफा वर्ल्ड कपचं आयोजनही कतारमध्ये आयोजित करण्यात आले होते.
शेख तहमीम बिन हमद अल थानी यांची संपत्ती किती?
कतारचे अमीर शेख तमीम बिन हमद अल थानी जगातील ९ वे सर्वात श्रीमंत शासक आहेत. त्यांची संपत्ती जवळपास ३३५ अब्ज डॉलर्स इतकी आहे. ४४ वर्षीय तमीम केवळ कतारमधील सर्वात युवा श्रीमंत आहेत तर जगातील सर्वात युवा राष्ट्राध्यक्षांमध्येही त्यांचं नाव घेतले जाते.
दोहा येथील रॉयल पॅलेसमध्ये राहणाऱ्या अमीर शेख यांचे तीन विवाह झाले असून त्यांना 13 मुले आहेत. 100 हून अधिक खोल्या असलेल्या या रॉयल पॅलेसची किंमत 1 अब्ज डॉलर्स आहे. इतकेच नाही तर या राजवाड्यात 500 कार पार्किंग सुविधा आहे. यात हेलिपॅड देखील आहे.
हेही वाचा:
