अबोलीची फुले माहिती नाहीत असा माणूस शोधूनही सापडनार नाही. या झुडपाला हिंदीमध्ये प्रियदर्श म्हणतात. याच्या बिया पाण्यात टाकल्या असता त्या फुलबाज्यांप्रमाणे तडतड वाजतात, म्हणून इंग्रजीत अबोलीला फायर क्रॅकर म्हणतात. अबोलीचे लॅटीन नाव क्रॉसॅंड्रा इन्फंडिबुलिफॉर्मिस असून कुल कॅंथेसी आहे. हे कोरांटीसारखे क्षुप (झुडूप) सुमारे 60 सेंमी. उंच, लहान, असते. अनेक वर्षे जगणारे हे झुडूप असून मूळचे श्रीलंकेमधील आहे.
मलायात व भारतात (उत्तर प्रदेश, पश्चिम बंगाल व पश्चिम द्वीपकल्प) शोभेकरिता लावतात. पाने साधी, समोरासमोर, कडा तरंगित; फुलोरा गव्हाच्या लोंबीसारखा कणिस व त्यावर लांबट हिरव्या व केसाळ छंदाच्या बगलेत सुंदर, नाजूक, फिकट पिवळट किंवा नारिंगी (अबोली) फुले येतात. इतर रंगांची फुले असलेले प्रकारही आढळतात. शुष्क फळात चार बिया असतात. ही वनस्पती कडू, उष्ण, सौंदर्यकारक व कामोत्तेजक आहे. या झुडूपाची मुळी दुधात शिजवून पांढऱ्या धुपणीवर औषध म्हणून पिण्यास देतात.
लागवड – बियांपासून रोपे करून अगर खोडाचे फाटे लावून लागवड करतात.
जमीन खणून, खत घालून 60-75 सेंमी. अंतराने पाडलेल्या सरीच्या बाजूला 60 सेंमी. अंतराने पावसाळ्यात रोपे लावतात. झाडांना एकामागून एक असे सारखे बहार वर्षभर येत असतात, परंतु ऑक्टोबर-जानेवारीच्या दरम्यान जास्तीत जास्त फुले येतात. फुलांच्या वेण्यांना मुंबई व सर्व कोकणभागांत फार मागणी असते. झाडांना वर्षायू झाडांप्रमाणे मशागत व खतपाणी दिल्यास जोम येऊन उत्तम बहार येतो.
रोग : पानावरील खार हा रोग कोलेटॉट्रिकम क्रॉसेंड्राय कवकामुळे होतो. त्यामुळे पानांवर व कडांवर अनियमित आकाराचे फिकट पिंगट डाग पडतात. ते एकमेकांत मिसळल्याने करपा होतो. रोगट पाने गळतात. कवकबीजाणूंचा प्रसार वाऱ्याने होऊन रोगप्रसार होतो. बोर्डो मिश्रणासारखी (3:3:50) कवकनाशके प्रतिबंधक उपाय म्हणून वापरतात. अबोलीची लागवड झटपट पैसे मिळवून देणारी असल्याने या लागवडीला विशेषत: कोकणात मुबलक मागणी असते.