पिंपरी : विधानसभा उपाध्यक्षपदासाठी उद्या, बुधवार दि. 26 मार्च 2025 रोजी होणार्‍या निवडणुकीसाठी अर्ज भरण्याचा आज (25 मार्च) शेवटचा दिवस असून राष्ट्रवादी काँग्रेस, भाजप, शिवसेना आणि मित्रपक्षांच्या महायुतीच्या वतीने राष्ट्रवादी काँग्रेसचे पिंपरीचे आमदार अण्णा बनसोडे यांनी आज आपला अर्ज दाखल केला. यावेळी मुख्यमंत्री देवेंद्र फडणवीस, उपमुख्यमंत्री अजित पवार, संसदीय कार्यमंत्री चंद्रकांत पाटील, उद्योगमंत्री उदय सामंत आदी मान्यवर यावेळी उपस्थित होते.
आमदार अण्णा बनसोडे यांची उपसभापतीपदी बिनविरोध निवड निश्चित मानली जात आहे. सत्ताधारी पक्षाचे 236 इतके संख्याबळ आणि त्याचवेळी विरोधकांचे केवळ 52 आमदार विधानसभेत आहेत. त्यामुळे बनसोडे यांची उपाध्यक्षपदी निवड निश्चित मानली जात आहे.
आमदार अण्णा बनसोडे हे उपमुख्यमंत्री अजित पवार यांचे कट्टर समर्थक मानले जातात. अजित पवार यांच्या राजकीय बंडाच्यावेळी आमदार बनसोडे यांनी त्यांची साथ दिली आहे. राष्ट्रवादी काँग्रेस पक्षाच्या तिकीटावर ते निवडणू आले असून, पिंपरी विधानसभा मतदार संघाचे ते तिसर्‍यांदा प्रतिनिधित्व करीत आहेत. आतापर्यंत दोनवेळा त्यांच्या नावाची राज्याच्या मंत्रीपदासाठी चर्चा होती.
