Pimpri Chinchwad News – पिंपरीगाव येथील जुन्या काटे–पिंपळे रस्त्यावरून पिंपळे सौदागरकडे जाताना पवना नदी पुलाजवळ मुख्य रस्त्यावर प्रवेशाच्या ठिकाणी करण्यात आलेले खोदकाम वाहनचालकांसाठी डोकेदुखी ठरले आहे. काम पूर्ण झाल्यानंतर खड्डे व्यवस्थित न बुजवल्याने या ठिकाणी मोठे खड्डे निर्माण झाले असून अपघाताचा धोका वाढला आहे. या मार्गावरून दररोज शेकडो वाहनांची वर्दळ असते. पुलाजवळील प्रवेशबिंदूवर रस्त्याच्या मधोमध व कडेला खोलगट भाग तयार झाला आहे. रात्रीच्या वेळी प्रकाश अपुरा असल्याने हे खड्डे लक्षात येत नाहीत. दिवसा नजिकच्या झाडांच्या सावलीमुळे रस्त्यावर अंधुक प्रकाश पडत असल्याने खड्डे दिसून येत नाहीत. परिणामी अनेक दुचाकीस्वारांचे संतुलन बिघडून वाहने अपघात होत असल्याच्या तक्रारी समोर येत आहेत. स्थानिक नागरिकांच्या म्हणण्यानुसार, गेल्या काही दिवसांत या ठिकाणी किरकोळ अपघातांची संख्या वाढली आहे. विशेषत: दुचाकीस्वारांना धक्का बसल्याने पाठीस व कंबरेस इजा होत असल्याचे सांगण्यात आले. कामानंतर योग्य पद्धतीने रस्ता दुरुस्त न केल्याने ही समस्या निर्माण झाली आहे. दरम्यान, संबंधित विभागाने तातडीने पाहणी करून खड्डे बुजवावेत, योग्य प्रकाशयोजना करावी आणि सुरक्षिततेसाठी इशारा फलक लावावेत, अशी मागणी नागरिकांकडून करण्यात येत आहे. संभाव्य मोठी दुर्घटना टाळण्यासाठी प्रशासनाने त्वरित उपाययोजना करणे आवश्यक असल्याचे मत व्यक्त होत आहे.