पिंपरी – महापालिकेच्या स्थावर मालमत्तेच्या ठिकाणी विविध घटकातील नागरिकांसाठी व्यावसायिक गाळे तयार केले आहेत. उद्योग व्यवसाय करण्यासाठी दहा वर्षे किंवा मासिक भाडे शुल्क आकारून हे गाळे वाटप केले जातात. शहरात महापालिकेने एकूण 798 गाळे निर्माण केले आहेत. त्यातील 665 गाळे वाणिज्य वापरासाठी लॉंग लीजने देण्याची नियामुसार तरतूद आहे. त्यातील 133 गाळ्यांवर विविध घटकातील आरक्षण जाहीर करण्यात आले आहे.मात्र, तीनवेळा जाहीर प्रकटन देऊनही या 133 गाळ्यांकडे लाभार्थ्यांनी पाठ फिरवली आहे.
पिंपरी-चिंचवड महापालिकेची स्थावर आणि जंगम मालमत्ता असलेल्या आस्थापनांमध्ये व्यवसायिक गाळ्यांची निर्मिती केली जाते. यानुसार शहरात महापालिकेच्या आठ क्षेत्रीय कार्यालयांतर्गत येणा-या महत्वाच्या चौकांमध्ये व अंतर्गात भागात एकूण 798 गाळे निर्माण केले आहेत. त्यातील 665 गाळे वाणिज्य वापरासाठी लॉंग लीजने देण्याची नियामुसार तरतूद आहे. त्यातील 133 गाळ्यांवर विविध घटकातील आरक्षण जाहीर करण्यात आले आहे. हे गाळे घ्यावेत म्हणून लाभार्थ्यांच्या निदर्शनास आणून देण्यासाठी तीनवेळा जाहीर प्रकटन दिले आहे. तरी देखील लाभार्थ्यांचा प्रतिसाद मिळत नसल्याची वस्तुस्थिती आहे. दहा वर्षांच्या भाडेकरारानुसार 133 गाळ्यांच्या माध्यमातून मिळणा-या अपेक्षित 6 कोटी 73 लाख 42 हजार 407 रुपयांच्या महसुली उत्पन्नाला फटका बसला आहे.
व्यावसायिक गाळ्यांच्या क्षेत्रफळानुसार दहा वर्षांच्या कालावधीसाठी निर्धारित शुल्क आकारून व्यवसाय करण्यासाठी करार पध्दतीने दिले जातात. भोसरी भाजी मंडई येथे तळमजला, पहिला मजला आणि दुस-या मजल्यावर 136 चौरस फुटाचे असे एकूण 82 गाळे आहेत.
निगडीतील संत तुकाराम महाराज व्यापारी संकुलात 785, 473, 1172, 483 चौरस फुट क्षेत्रफळाचे चार गाळे आहेत. आकुर्डीतील बंटी प्रॉपर्टींज व्यापारी संकुलात 147, 278 आणि 190 चौरस फुट क्षेत्रफळाचे 3 गाळे आहेत. पिंपरी वाघेरे येथील संकुलात 194 फुट क्षेत्रफळाचे तीन गाळे आणि यंशवंतराव चव्हाण स्टेडियम येथे 250 चौरस फुट क्षेत्रफळाचे चार गाळे आहेत. तपोवन मार्गावर 296, 288, 126, 155, 144 आणि 266 चौरस फुटाचे 24 गाळे आहेत. रिटेल मार्केटमध्ये 193 चौरस फुटाचा एक गाळा आहे. तर, सांगवीतील ऐतिहासिक उद्यानात 67 चौरस फुटाचे तीन गाळे आहेत.
तसेच, चिंचवड येथील व्यापारी संकुलात 193.64, 207.52, 419.37 चौरस फुट क्षेत्रफळाचे आठ गाळे आहेत. तर, रावेतच्या बीआरटी टर्मिनल येथे 67.88 चौरस फुटाचा एक गाळा आहे. हे गाळे दहा वर्षे भाडेकरारानुसार येणारी रक्कम भरणा-या व्यक्तीला दिले जातात. दरमहा भाडे आकारून गाळे देण्याची देखील तरतूद आहे. मात्र, हे आरक्षित गाळे घेण्यासाठी लाभार्थ्यांचा प्रतिसाद मिळत नसल्यामुळे पालिकेला 6 कोटी 73 लाख 42 हजार 407 रुपयांचे महसुली नुकसान सहन करावे लागत आहे.
आरक्षित गाळे तपशील
दिव्यांग 6
महिलांच्या स्वयंसहायित गटासाठी 35
खुल्या गटासाठी 59
शेतकरी उत्पादक गट 9
अनुसूचित जाती व जमाती, विभक्त जाती व भटक्या जमाती 5
विस्थापित व्यक्तींसाठी 1
विविध घटकातील आरक्षित गाळ्यांचा लाभार्थ्यांनी नियमानुसार ताबा घ्यावा, यासाठी तीनवेळा जाहीर प्रकटनाद्वारे माहिती निदर्शनास आणून दिली. तरीही गाळे घेण्यास प्रतिसाद मिळत नसल्याचे लक्षात आले. आता जी व्यक्ती गाळे घेण्यासाठी अर्ज करेल त्याला नियमानुसार भाडेकराराची रक्कम आकारून गाळ्यांचा ताबा दिला जाईल.
– मंगेश कोळप, प्रशासन अधिकारी