सातारा : राज्य सामाईक कक्ष (सीईटी सेल) यांनी राज्यातील पदवी व पदव्युत्तर शाखेतील (बी. फार्मसी, एम. फार्मसी) अभ्यासक्रमातील तिसऱ्या फेरीच्या प्रवेश प्रक्रियेला स्थगिती दिली होती. ही स्थगिती सीईटी सेलच्या दि. ५ डिसेंबर २०२४ निर्णयानुसार उठवली आहे. त्यामुळे विद्यार्थ्यांना आता औषधनिर्माणशास्त्र शाखेतील पदवी व पदव्युत्तर शाखेतील प्रथम वर्षाच्या प्रवेशाचा मार्ग खुला झाला असल्याची माहिती श्रीरंग काटेकर यांनी दिली.
वास्तविक औषधनिर्माणशास्त्र शाखेतील सर्व शाखेचे प्रवेश जुलै, ऑगस्ट 2024 मध्ये पूर्ण होणे अपेक्षित होते. परंतु, राज्यातील अनेक नव्याने उभारलेल्या महाविद्यालयानी अखिल भारतीय फार्मसी कौन्सिल ऑफ इंडिया नवी दिल्ली या शिखर संस्थेकडे औषधनिर्माणशास्त्र शाखेतील अभ्यासक्रम नव्याने सुरू करण्यासाठीचे प्रस्ताव सादर केले होते. नव्याने परवानगी मागणाऱ्या महाविद्यालयाच्या प्रस्तावाची पडताळणी व तज्ञांच्या देखरेखेच्या अधीन राहून या महाविद्यालयांना नव्याने औषधनिर्माणशास्त्र शाखेचा अभ्यासक्रम सुरू करण्यासाठी मान्यता देण्यात आली होती. परंतु शासनाच्या दोन केंद्रीभूत प्रवेश फेऱ्यांमध्ये या महाविद्यालयाचा समावेश झाला नव्हता.
महाविद्यालयांनी केंद्रीभूत प्रवेश प्रक्रियेत महाविद्यालय समाविष्ट व्हावे यासाठी न्यायालयात धाव घेतली होती. त्या आधारे राज्य सामाईक परीक्षा कक्ष यांनी राज्यातील सर्वच महाविद्यालयातील तिसऱ्या फेरीच्या प्रवेश प्रक्रियेला स्थगिती दिली होती. शैक्षणिक वर्ष सन 2024 – 25 च्या औषधनिर्माणशास्त्र शाखेतील प्रवेशास विलंब झाल्याने या शाखेत प्रवेश घेणाऱ्या असंख्य विद्यार्थ्यांमध्ये नाराजी सूर उमटविला होता परंतु आता सीईटी सेलने ही स्थगिती उठवल्याने या क्षेत्रात करिअर करणाऱ्या विद्यार्थ्यांना आता मार्ग मोकळा झाला आहे.
तिसर्या् फेरीच्या प्रवेश प्रक्रियेला सुरुवात
सीईटी सेलने उठविलेल्या स्थगितीमुळे विद्यार्थ्यांमध्ये उत्साहाचे वातावरण निर्माण झाले असून तिसर्या् फेरीच्या प्रवेश प्रक्रियेला आता सुरुवात झाली असून बी. फार्मसी व एम. फार्मसी ऑप्शन फॉर्म भरण्यासाठी दि. ७ डिसेंबर २०२४ ते दि. ९ डिसेंबर २०२४ पर्यंत मुदत असून तर प्रवेश निश्चितीसाठी दि. १३ ते १६ डिसेंबर २०२४ अशी मुदत आहे. दि. २३ डिसेंबर २०२४ रोजी प्रवेश प्रक्रिया पूर्ण होणार आहे. तिसऱ्या व अंतिम प्रवेश प्रक्रियेतून प्रवेश घेणाऱ्या विद्यार्थ्यांना शासन शिष्यवृत्तीचा लाभ मिळणार आहे. विशेषत: शैक्षणिक वर्ष सन २०२४-२५ मध्ये या अभ्यासक्रमाकडे प्रवेश घेणाऱ्या मुलींना आता शासन नियमाच्या अधीन राहून मोफत शिक्षणाची संधी मिळणार आहे. त्यामुळे यावर्षी या अभ्यासक्रमाकडे मुलींचा प्रवेशाचा ओढा वाढला आहे.
