नवी दिल्ली : एनआयएने कर्नाटकातील प्रवीण नेत्तारू हत्याकांड प्रकरणात आरोपपत्र दाखल केले आहे. या प्रकरणात एनआयएने आतापर्यंत 20 आरोपींना अटक केली आहे. 6 जुलै 2022 रोजी भाजप युवा मोर्चाचा कार्यकर्ता प्रवीण नेत्तारू यांची दक्षिण कन्नड येथील बेल्लारे इथे त्यांच्याच दुकानासमोर निर्घृणपणे हत्या करण्यात आली होती. याच प्रकरणी आता एनआयएने आरोपपत्र दाखल केले आहे.
राष्ट्रीय तपास यंत्रणा प्रवीण नेत्तारू खून प्रकरणाचा तपास करत असून आतापर्यंत या हत्याकांडात अनेक धक्कादायक खुलासे समोर आले आहेत. एनआयएने दिलेल्या माहितीनुसार, प्रवीण नेत्तारू हत्या प्रकरणामागे पॉप्युलर फ्रंट ऑफ इंडियाचा हात होता.
या प्रकरणातील फरार आरोपींवर तपास यंत्रणेने बक्षीसही जाहीर केले आहे. पीएफआय पुढील 24 वर्षे म्हणजे 2047 पर्यंत भारताला इस्लामिक देश बनवण्याचा कट रचत असल्याचं तपासात समोर आले आहे.
एनआयएने आरोपपत्रात, ‘पीएफआय दहशत पसरवणं, जातीय द्वेष आणि अशांतता निर्माण करण्याच्या अजेंडाचा एक भाग म्हणून, भारताला 2047 पर्यंत इस्लामिक देश बनवण्याचा कट रचत आहे. त्यांनी किलर स्क्वॉड नावाच्या गुप्त पथकांची स्थापना केली आहे.’अशी माहिती दिली आहे.