Bangladesh Vs Pakistan – शेख हसीना यांनी बांगलादेश सोडल्यानंतर सुरू असलेल्या घटनांबाबत पाकिस्तानने प्रथमच अधिकृत प्रतिक्रिया दिली आहे. त्या देशाने बांगलादेशातील नागरिकांसोबत आम्ही एकजुट असल्याचा दावा केला आहे. तसेच बांगलादेशातील स्थिती लवकरच सामान्य होईल असा विश्‍वास व्यक्त केला आहे.
वास्तविक पाकिकस्तानच्या विभाजनातूनच बांगलादेशची निर्मिती झाली आहे. पाकिस्तानातील तत्कालीन राजवटीचे अत्याचार सहन न झाल्यामुळेच बांगलादेशने आपले पहिले स्वातंत्र्य युध्द पुकारले होते आणि तो स्वतंत्र देश अस्तित्वात आला होता. मात्र त्यानंतर आता इतक्या वर्षांनी बांगलादेशात अस्वस्थता माजली आहे.
विशेष म्हणजे अधिकृतपणे पाकिस्तान काहीही म्हणत असला तरी मुळात बांगलादेशातील आशांततेबद्दल पाकिस्तानातील पत्रकारांनी, काही संरक्षण तज्ज्ञांनी व पाकिस्तानचे भारतातील माजी राजदुत आदी बहुतांश जणांनी याबाबत आनंदच व्यक्त केला आहे.
बांगलादेशातील अराजकतेमध्ये त्यांना कुठेतरी अर्ध्या शतकापूर्वी झालेल्या जखमेवर मलम मिळाले असल्याची त्यांची भावना असल्याचे त्यातून प्रतित होत होते. काही तज्ज्ञांनी मग ते पाकिस्तानातील असो वा भारतातील या घडामोडींमागे कुठेतरी पाकिस्तान अथवा चीन अथवा दोघांचा हात असल्याची शंका बोलून दाखवली आहे.
