कराची – पाकिस्तानमध्ये कराचीच्या केमारी भागात 14 मुलांसह 18 जणांचा एका गूढ आजारामुळे मृत्यू झाला आहे. पाकिस्तानच्या या दक्षिणेकडील बंदरगाह शहरातील आरोग्य अधिकारी अद्याप मृत्यूचे कारण शोधू शकले नाहीत. आरोग्य सेवा संचालक अब्दुल हमीद जुमानी यांनी शुक्रवारी पुष्टी केली की, केमारीच्या मावाच गोठ परिसरात 10 ते 25 जानेवारी दरम्यान 14 मुलांसह 18 लोकांचा रहस्यमय आजाराने मृत्यू झाला आहे.
अब्दुल हमीद जुमानी म्हणाले, आरोग्य पथक अजूनही या मृत्यूंचे कारण शोधण्यासाठी काम करत आहे, परंतु आम्हाला शंका आहे की ते समुद्र किंवा पाण्याशी संबंधित असू शकतात कारण हे मृत्यू ज्या गोठ गावात झाले आहेत ते किनारी क्षेत्राच्या अगदी जवळ आहे. हा झोपडपट्टीचा भाग आहे जेथे लोक बहुतेक रोजंदारी मजूर किंवा मच्छीमार आहेत.
जुमानी म्हणाले की, मृतांच्या नातेवाईकांनी मृत्यूपूर्वी पुष्टी केली होती की, त्यांच्या नातेवाईकांना खूप ताप, घशात सूज आणि श्वास घेण्यास त्रास होत होता. गेल्या दोन आठवड्यांपासून परिसरातून एक विचित्र वास येत असल्याची तक्रार काही लोकांनी केली आहे, असे अधिकाऱ्याने सांगितले आहे. केमारीचे उपायुक्त मुख्तार अली अब्रो यांनी सांगितले की, त्यांनी या संदर्भात एका कारखान्याच्या मालकाचीही चौकशी केली होती. त्यासाठी त्याला ताब्यात घेण्यात आले आहे. ते म्हणाले की आम्ही राज्य पर्यावरण एजन्सीला बोलावले होते ज्याने या भागात कार्यरत असलेल्या तीन कारखान्यांचे नमुने गोळा केले आहे. कारखान्यातील दुषित वायुमुळे लोकांचे मृत्यू झाल्याची शंका उपस्थित केली जात आहे.
सिंध केंद्राचे (केमिकल सायन्सेस) प्रमुख इक्बाल चौधरी म्हणाले की, त्यांनी कारखान्यांमधून काही नमुने गोळा केले आहेत आणि त्यांना वाटते की मृत्यूचे कारण सोया ऍलर्जी देखील असू शकते. ते म्हणाले की, हवेतील सोयाबीनच्या धुळीच्या कणांमुळे गंभीर आजार आणि मृत्यूही होऊ शकतात आणि त्यात वायू प्रदूषण आणि हवामानाची मोठी भूमिका आहे. चौधरी म्हणाले की, आम्ही अद्याप कोणत्याही निश्चित निष्कर्षापर्यंत पोहोचलो नसून नमुने तपासले जात आहेत.
