लखनौ – ज्ञानवापी मशिदीत शिवलिंग सापडल्याच्या दाव्यानंतर एआयएमआयएम (AIMIM) प्रमुख असदुद्दीन ओवेसी यांनी प्रतिक्रिया दिली आहे. ओवेसी म्हणाले, ‘ज्ञानवापी मस्जिद थी और इंशाअल्लाह कयामत तक ज्ञानवापी मस्जिद ही रहेगी’. ते म्हणाले मी 20-21 वर्षांचा होतो तेंव्हा बाबरी मशीद आमच्याकडून हिसकावण्यात आली होती, मात्र आता पुन्हा 20-21 वर्षांच्या मुलांसमोर ज्ञानवापी मशीद गमावणार नाही.
त्यांनी जनतेला आवाहन केले की, कधीही कोणतीही मशीद गमावणार नाही, अशी शपथ घ्यावी. त्याचवेळी विश्व हिंदू परिषदेचे नेते विनोद बन्सल यांनी ओवेसींच्या वक्तव्यावर प्रतिक्रिया व्यक्त करत आता या सर्वांची कयामत येणार आहे, ते स्वत: त्यांना निमंत्रण देत असल्याचे म्हटले आहे. ते म्हणाले की, सर्वेक्षणापूर्वी विरोध करून अडथळे आणत होते, आता सर्व सत्य बाहेर आल्यावर त्यांना पराभवाचा सामना करावा लागत आहे. ओवेसींच्या बोलण्याचा आता काहीही उपयोग नसल्याचे ते म्हणाले.
बन्सल म्हणाले की, ओवेसी हे खासदार आहेत आणि ते स्वतःला वकील म्हणवतात, तरीही मुस्लिमांना भडकवण्याचे काम ते करत आहेत. आता सत्य बाहेर आल्याने ओवेसीसारख्या नेत्यांचे चेहरे काळवंडले आहेत. हिंदू समाजाच्या श्रद्धेला ठेच पोहोचवण्याचे काम त्यांनी केल्याबद्दल त्यांनी देशातील जनतेची माफी मागितली पाहिजे. त्याऐवजी ते मुस्लिमांना भडकवण्याचा प्रयत्न करत आहेत.
त्याचवेळी उत्तर प्रदेशचे उपमुख्यमंत्री केशव प्रसाद मौर्य यांनी मशिदीतील शिवलिंगाच्या दाव्याबाबत ट्विट करत आनंद व्यक्त केला आहे. ते म्हणाले की, बुद्धपौर्णिमेनिमित्त ज्ञानवापी मशिदीत बाबा महादेवांच्या प्रकटीकरणाने देशाच्या सनातन हिंदू परंपरेला पौराणिक संदेश दिला आहे.
ते म्हणाले की, माझ्याप्रमाणे देशातील प्रत्येक शिवभक्ताला याचा आनंद आहे. शतकानुशतके नंदीबाबा भोलेनाथ कधी भेटतील आणि मी त्यांचे दर्शन घेणार याची वाट पाहत होतो. आता कोर्ट कमिशनरच्या माध्यमातून सर्वेक्षण करण्यात आले असून त्यात शिवलिंग असल्याचे स्पष्ट झाले आहे. याचा मला खूप आनंद झाला आणि हा आनंद शब्दात वर्णन करता येणार नाही.
काशी विश्वनाथ मंदिराशेजारी असलेल्या ज्ञानवापी मशिदीत शिवलिंग असल्याचा दावा आता खरा ठरला आहे. न्यायालयाच्या आदेशानंतर सुरू असलेल्या सर्वेक्षणाच्या तिसऱ्या दिवशी शिवलिंग सापडल्याचा दावा करण्यात आला आहे. हिंदू पक्षाचे वकील विष्णू जैन यांनी सांगितले की, विहिरीच्या आत पाहणीदरम्यान शिवलिंग सापडले. यानंतर न्यायालयाने ही जागा सील करून ती जतन करण्याचा दावा केला आहे. मात्र, मुस्लिम पक्षाने कोणतेही शिवलिंग दिसले नसल्याचे सांगितले आहे.
