Suresh Mapari : महाराष्ट्राच्या राजकारणात सुरू असलेल्या पक्षांतराच्या लाटेत आता विदर्भातील वाशिम जिल्ह्यातून मोठी राजकीय घडामोड समोर आली आहे. सुरेश मापारी यांनी शिवसेना उद्धव बाळासाहेब ठाकरे गटाच्या जिल्हाप्रमुख पदाचा राजीनामा दिल्यानंतर अवघ्या दोन दिवसांत भाजपमध्ये प्रवेश करण्याचा निर्णय घेतला आहे. विशेष म्हणजे, २५० कार्यकर्त्यांसह आज मापारी भाजपमध्ये प्रवेश करणार असल्याची दाट शक्यता आहे. या राजकीय घटनेमुळे वाशिमच्या राजकारणात मोठी खळबळ उडाली आहे. जिल्हाप्रमुख पदावरून पायउतार झाल्यानंतर सुरेश मापारी यांनी आपल्या समर्थकांची तातडीची बैठक घेतली. त्यानंतर त्यांच्या नेतृत्वाखाली प्रमुख पदाधिकारी, सरपंच आणि कार्यकर्त्यांचा मोठा गट मुंबईकडे रवाना झाला. तब्बल २९ वाहनांचा ताफा वाशिममधून मुंबईच्या दिशेने निघाल्याने राजकीय चर्चांना उधाण आले आहे. आज सकाळी मुख्यमंत्री देवेंद्र फडणवीस यांच्या उपस्थितीत हा पक्षप्रवेश पार पडण्याची शक्यता व्यक्त केली जात आहे. दोन दिवसांपूर्वीच ठाकरे गटाने वाशिम जिल्हाप्रमुख पदाची जबाबदारी सुरेश मापारी यांच्याकडून काढून घेत बालाजी वानखेडे यांच्याकडे सोपवली होती. पक्षाच्या या निर्णयामुळे मापारी नाराज असल्याची चर्चा होती. तसेच स्थानिक खासदार संजय देशमुख यांच्या कार्यपद्धतीवर आणि पक्षातील अंतर्गत राजकारणावरही त्यांनी नाराजी व्यक्त केल्याचे बोलले जात होते. यापूर्वी सुरेश मापारी हे एकनाथ शिंदे यांच्या नेतृत्वाखालील शिवसेनेत जाणार असल्याच्या चर्चा होत्या. मात्र, त्यांनी अखेर भाजपमध्ये जाण्याचा निर्णय घेतला आहे. कोण आहेत सुरेश मापारी? सुरेश मापारी हे वाशिम जिल्ह्यातील प्रभावशाली नेते मानले जातात. त्यांनी जिल्हा परिषद सदस्य, अर्थ व बांधकाम समिती सभापती तसेच कृषी उत्पन्न बाजार समितीचे सभापती अशी अनेक महत्त्वाची पदे भूषवली आहेत. ग्रामीण भागात त्यांचा मोठा जनसंपर्क आणि कार्यकर्त्यांचे मजबूत जाळे असल्याने आगामी निवडणुकांमध्ये ठाकरे गटाला याचा मोठा फटका बसू शकतो, अशी चर्चा राजकीय वर्तुळात रंगली आहे. हेही वाचा : Ambadas Danve : “जनतेच्या हातातील गाड्या हिरावून, त्यांच्या हातात ‘हातगाड्या’ देणे, हाच या सरकारचा ‘मास्टरस्ट्रोक’ दिसतोय”