“थ्री स्टार’ रॅंकिंगसाठी जानेवारी महिन्यात सर्वेक्षण होणार
नगर – स्वच्छता सर्वेक्षणात्तील पहिल्या टप्प्यात झालेल्या ओडीएफ सर्वेक्षणात मनपाला ओडीएफ प्लस दर्जा मिळाला आहे. मागील दोन तिमाहीमध्ये स्वच्छता विषयी उपाययोजना प्रत्यक्ष अंमलबजावणी यात सुधारणा होत असल्याने देशातील दहा लाखांपर्यंत लोकसंख्या असलेल्या पहिल्या शंभर स्वच्छ शहरांमध्ये नगरचा समावेश झाला आहे. पहिल्या तिमाहीत नगर शहर 78 व्या क्रमांकावर होते. तर दुसऱ्या तिमाहीत नगर शहर 96 या क्रमांकावर असल्याचे केंद्र सरकारने जाहीर केलेल्या निकालातून समोर आले आहे.
स्वच्छता सर्वेक्षणाच्या पार्श्वभूमीवर नगर महानगरपालिकेकडून शहरांमध्ये स्वच्छताविषयक उपाययोजना केल्या जात आहेत. शहरात घर ते घर कचरा संकलन व वाहतूकीसाठी खासगीकरणातून काम सुरु करण्यात आले आहे. तसेच मोकळ्या भूखंडावरील कचरा उचलण्यासाठी, कायम कचरा टाकल्या जाणाऱ्या जागांवर स्वच्छता राखण्यासाठी उपाययोजना सुरु आहेत. पूर्ण क्षमतेने कचरा संकलन व्हावे, यासाठी नवीन वाहनांची खरेदी होणार आहे. प्लॅस्टिक मुक्त शहरासाठी शासनाच्या निर्देशानुसार कारवाई सुरु करण्यात आली आहे.
तसेच कचऱ्याची विल्हेवाट लावण्यासाठी खत प्रकल्प, हॉटेल वेस्ट, मृत जनावरांच्या अवशेषांची विल्हेवाट लावण्यासाठी बायोमेंथानेशन प्रकल्प, मोठ्या मृत जनावरांसाठी विद्युत दाहिनी, शहरात चार छोटे खत प्रकल्प, सेप्टीक टॅंक मधील उचलण्यात आलेल्या मैल्यावर प्रक्रियेसाठी एफएसटीपी प्रकल्प प्रस्तावित आहेत. त्यातील काहींची कामे सुरू झालेली आहेत. स्वच्छता पचा वापर वाढविण्यासाठी प्रयत्न सुरु आहेत. होम कंपोस्ट प्रकल्पासाठी महापालिका कर्मचाऱ्यांच्या पुढाकारातून जनजागृती सुरु आहे.
मागील तीन वर्षांपासून स्वच्छता सर्वेक्षणातील घसरलेल्या रॅंकिंगमध्ये सुधारणा होत असून, स्वच्छ सर्वेक्षण 2020 अंतर्गत महापालिकेकडून उपाययोजना सुरू आहेत. मनपा पदाधिकारी व अधिकारी परिणामकारक अंमलबजावणीसाठी प्रयत्न करत आहेत. त्याचाच परिणाम म्हणून मागील दोन तिमाहीच्या रॅंकिंगमध्ये दहा लाखांच्या आत लोकसंख्या असलेल्या शहरांच्या क्रमवारीमध्ये नगर शहराचा देशातील पहिल्या शंभर स्वच्छ शहरांमध्ये क्रमांक आला आहे.
काही स्वयंसेवी संस्था, शाळा, बचत गट आदींचा सहभाग वाढविण्यासाठी प्रयत्न सुरु आहेत. महापौर वाकळे व जिल्हाधिकारी द्विवेदी यांनी यासाठी बैठक घेउन सूचना दिल्या.
स्वच्छतेसाठी मनपाकडून उपाययोजना सुरू
सर्वेक्षणातील प्रमुख टप्पा असलेल्या “थ्री स्टार’ रॅंकिंगसाठी जानेवारी महिन्यात सर्वेक्षण होणार आहे. त्यासाठी मनपाकडून तयारी सुरू आहे. उपाययोजनांमध्ये सातत्य राहिल्यास व शहरातील स्वच्छतेमध्ये आणखी सुधारणा झाल्यास सर्वेक्षणाच्या अंतिम निकालातही नगर शहराचा पहिल्या 50 शहरांमध्ये समावेश होऊ शकतो, असा विश्वास महापौर वाकळे व जिल्हाधिकारी राहुल द्विवेदी यांनी व्यक्त केला.