नवी दिल्ली -ऑलिम्पिक स्पर्धाच नव्हे तर कोणत्याही स्तरावरील स्पर्धेत पदक जिंकणारे खेळाडू मिळालेल्या पदकाचा चावा घेताना दिसतात. मात्र, या मागचे खरे कारण कोणालाही अद्याप समजलेले नव्हते. पूर्वीपासून ही परंपरा सुरू असून त्यामागे मिळालेल्या सुवर्णपदकाची सत्यता तपासण्यासाठीच पदकाचा चावा घेतला जात होता. काळ बदलला तसा त्यात बदलही झाला असून आता खेळाडू केवळ फोटोशूटसाठीही असे केले जाते.
ऑलिम्पिक वगळता अनेकदा टेनिसची स्पर्धा जिंकल्यानंतर स्पेनचा राफेल नदालही अनेकदा जिंकलेल्या करंडकाचा चावा घेताना दिसून येतो, त्यामागे करंडकात वापरलेल्या सोन्याची सत्यता तपासण्याचा हेतू नसतो तर फोटोसाठी सुरेख पोझ देता यावी हा हेतू दिसतो.
पहिल्या क्रमांकाच्या विजेत्याला सुवर्णपदक, दुसऱ्या क्रमांकाच्या विजेत्याला रजतपदक आणि तिसऱ्या क्रमांकाच्या विजेत्याला ब्रॉंझपदक दिले जाते. पूर्वीच्या काळात सुवर्णपदक शुद्ध सोन्याचा वापर करून तयार केले जात होते. जेव्हा पहिल्या क्रमांकाचे विजेते सोन्याचे पदक चावायचे, तेव्हा त्यांच्या दातांचे व्रण त्या पदकावर उमटावे हा हेतू असायचा तसेच ते पदक खरे सोने वापरून केले आहे ना हेदेखील तपासले जायचे.
चांदीचाच सर्वाधिक वापर
आताच्या काळात केवळ छायाचित्रासाठी पोझ म्हणून खेळाडू ही कृती करतात. सध्या खेळाडूंना दिली जाणारी सुवर्णपदके शुद्ध सोन्यापासून तयार केली जात नाही. त्यात मोठ्या प्रमाणात चांदी वापरी जाते. पुढील आठवड्यापासून सुरू होणाऱ्या टोकियो ऑलिम्पिक स्पर्धेत देण्यात येणाऱ्या सुवर्णपदकात केवळ सहा ग्रॅम सोने वापरले गेले आहे. या पदकाचे वजन 56 ग्रॅम असून त्यातील चांदीचे वजन 50 ग्रॅम असून सोन्याचे प्रमाण केवळ 6 ग्रॅम आहे.