स्टॉकहोम – कृष्णविवराच्या संशोधनासाठी रॉजर पेन्रोस यांना तर आकाशगंगेच्या मध्यभागी असलेल्या ‘सुपरमॅसिव्ह कॉम्पॅक्ट ऑब्जेक्ट’च्या शोधासाठी रिन्हार्ड जेंझेल आणि ऍन्ड्रीया घेझ यांना यंदाचा भौतिकशास्त्राचे नोबेल पुरस्कार जाहीर झाला आहे.
एकाच क्षेत्रात काम करणाऱ्या संशोधकांना एकत्रितपणे नोबेल जाहीर होणे, ही अत्यंत स्वाभाविक गोष्ट आहे. गेल्या वर्षी जन्माने कॅनडाचे असलेले कॉस्मॉलॉजिस्ट जेम्स पीबल्स यांना बिग बॅंगनंतरच्या प्राथमिक क्षणांबाबतच्या सिद्धांतासाठी तर स्वीस खगोलशास्त्रज्ञ मिशेल मेयर आणि डिडर क्वीझ यांना सूर्यमालेबाहेरील ग्रहाच्या शोधासाठी नोबेल पारितोषिक दिले गेले होते.
सुवर्णपदक आणि 10 दशलक्ष स्वीडीश क्रोनोर (1.1 दशलक्ष डॉलरपेक्षा अधिक) इतकी रक्कम पारितोषिक म्हणून दिली जाते. चलनवाढ लक्षात घेता या रकमेमध्ये वाढ करण्यात आली आहे.
सोमवारी नोबेल कमिटीने भौतिकशास्त्र आणि औषध क्षेत्रासाठीच्या नोबेल पुरस्कारार्थींची घोषणा केली. अमेरिकेचे हार्वे अल्टर आणि चार्ल्स राईस यांच्यासह ब्रिटिश वंशीय संशोधक मायकेल ह्युटन यांना हिपॅटायटीस सी विषाणूवरील औषधाच्या शोधासाठी नोबेल जाहीर झाले आहे.
आता रसायनशास्त्र, साहित्य, शांतता आणि अर्थशास्त्राच्या क्षेत्रात विशेष उल्लेखनीय कामगिरी करणाऱ्या व्यक्तींनाही नोबेल पुरस्कारांची घोषणा होणे बाकी आहे.