नवी दिल्ली : उत्तराखंडमध्ये रेल्वे स्थानकांवर लावण्यात आलेल्या स्थानकाच्या नावांच्या फलकामधील उर्दू भाषेतील नावाचा उल्लेख आता संस्कृत भाषेत केला जाणार आहे. रेल्वे प्रशासनाने हा निर्णय घेतला आहे. संस्कृत ही उत्तराखंड राज्याची दुसरी अधिकृत भाषा असल्याने हा बदल करण्यात आला असून तो नियमानुसारच आहे, हा बदल करण्यामागचे कारण सांगताना उत्तर रेल्वेने स्पष्टीकरण दिले आहे. 2010 मध्ये उत्तराखंडचे मुख्यमंत्री रमेश पोखरियाल निशंक यांनी संस्कृत ही राज्याची दुसरी अधिकृत भाषा असल्याची घोषणा केली होती. हे निशंक आता केंद्रीय मनुष्यबळविकास मंत्री आहेत.
उत्तर रेल्वेचे जनसंपर्क अधिकारी दीपक कुमार यांच्या माहितीनुसार, रेल्वेच्या नियमावलीत हे सांगण्यात आले आहे की, प्लॅटफॉर्मवरील साईन बोर्डवर रेल्वे स्थानकांची नावे हिंदी आणि इंग्रजीनंतर संबंधित राज्याच्या दुसऱ्या अधिकृत भाषेत लिहिली जायला हवीत.
आता संपूर्ण उत्तराखंडमध्ये रेल्वे स्थानकांवरील फलकांमध्ये हिंदी, इंग्रजी आणि उर्दूऐवजी हिंदी, इंग्रजी आणि संस्कृत भाषेत स्थानकांची नावे लिहिण्यात येतील. उत्तराखंडची दुसरी अधिकृत भाषा संस्कृत असल्याने रेल्वे स्टेशन्सवर उर्दूमध्ये लिहिलेल्या नावांना बदलून संस्कृतमध्ये करण्यात येणार आहे, दीपक कुमार यांनी ही माहिती दिली. उत्तराखंड राज्याची निर्मिती 9 नोव्हेंबर 2000 मध्ये झाली तरी आजपर्यंत रेल्वे स्थानकांवरील नावं उर्दूमध्येच लिहिण्यात येत होती. कारण, यातील बहुतेक स्थानकांची नावं ही उत्तराखंड उत्तर प्रदेश राज्याचा भाग होते तेव्हापासूनची आहेत. उत्तर प्रदेशची दुसरी अधिकृत भाषा उर्दू आहे.