मुंबई : भाजपा प्रदेशाध्यक्ष चंद्रशेखर बावनकुळे यांनी विधानसभेच्या २८८ जागांपैकी भाजपा २४० लढवेन, तर शिवसेनेला (शिंदे गट) ४८ जागा देऊ, असे खळबळजनक वक्तव्य केले होते. त्यांच्या विधानानंतर शिंदे गटातून आक्रमक प्रतिक्रिया समोर येत आहेत. त्यातच राष्ट्रीय समाज पक्षाचे सर्वेसर्वा महादेव जानकर यांनीही भाजपला कडक इशारा दिला आहे. भाजपाला आमची गरज नसेल, तर स्वतंत्र लढू”, असे जानकर यांनी म्हटले आहे.
महादेव जानकर यांनी माध्यमांशी बोलताना बावनकुळेंच्या वक्तव्याचा समाचार घेतला, ते म्हणाले,“आपल्या चौकात आपली औकात वाढवली पाहिजे. महाराष्ट्रात माझे दोन आमदार आहेत. ९८ जिल्हापरिषद सदस्य, ३ सभापती, आसाम आणि कर्नाटकमध्ये प्रत्येकी १ जिल्हापरिषद सदस्य, गुजरातमध्ये २८ नगरसेवक आहेत. चार राज्यात तांत्रिकदृष्ट्या राष्ट्रीय समाज पक्षाला मान्यता मिळाली आहे. त्यामुळे भाजपाला आमची गरज वाटत नसेल, तर आम्ही स्वतंत्र लढणार.”असा निर्धारच यावेळी त्यांनी बोलून दाखवला.
“आम्हाला घेण्याची भाजपाची इच्छा नाही. तर, आम्ही कशाला त्यांच्यामागे लागायचं आणि त्यांनी नाही म्हणायचं. आमच्या ताकदीवर ४८ लोकसभा निवडणूक लढण्याची तयारी आहे,” असे जानकर यांनी सांगितले.
“राष्ट्रीय समाज पक्ष भाजपावर अवलंबून नाही. भाजपाला गरज वाटली, तर आम्हाला बरोबर घेतील. नसेल तर आमचा रस्ता वेगळा आहे. भाजपाकडे आम्ही पाच जागांचा प्रस्ताव ठेवला आहे. जिथे आमची लढण्याची औकात आहे, तेथील जागाच मागत आहोत. तो प्रस्ताव मान्य नसेल आणि त्यांना एकनाथ शिंदेंबरोबर आघाडी करण्याचं ठरवलं असेल, तर त्यांना शुभेच्छा आहेत,” असे महादेव जानकर यांनी म्हटले. “आमच्या ताकदीवर सर्व जागी उमेदवार उभे करू. काही ठिकाणी जिंकू, तर काही ठिकाणी पराभूत करण्याच्या भूमिकेत जाऊ,” असेही महादेव जानकर म्हणाले.