मुंबई – दक्षिण आफ्रिकेसह इतर विकसित देशात करोनाच्या ओमायक्रॉनचे रुग्ण आढळून येत असतानाच कर्नाटकमध्ये दोन रुग्ण आढळून आल्यामुळे सावध गुंतवणूकदारांनी शुक्रवारी शेअर बाजारात विक्री केली. त्यामुळे शेअर निर्देशांकामध्ये बरीच घट नोंदली गेली.
बाजार बंद होताना मुंबई शेअर बाजाराचा निर्देशांक सेन्सेक्स 764 अंकानी कमी होऊन 57,696 अंकांवर बंद झाला. राष्ट्रीय शेअर बाजाराचा निर्देशांक निफ्टी 204 अंकांनी म्हणजे 1.18 टक्क्यांनी कमी होऊन 17,196 अंकावर बंद झाला.
एचडीएफसी बॅंक, कोटक बॅंक, रिलायन्स इंडस्ट्रीज, पावर ग्रिड, एशियन पेंट्स, टेक महिंद्रा, एअरटेल या बड्या कंपन्यांच्या शेअरच्या भावात घट झाल्यामुळे निर्देशांकाना आधार मिळाला नाही. अशा परिस्थितीतही इंडसइंड बॅंक, टाटा स्टील, अल्ट्राटेक सिमेंट या कंपन्यांच्या शेअरच्या भावात थोडीफार वाढ झाली.
या घटनाक्रमाबाबत कॅपिटल व्हायाग्लोबल रिसर्च या संस्थेचे विश्लेषक गौरव गर्ग यांनी सांगितले की, करोनाविषयक परिस्थिती बिघडत चालल्यामुळे आता गुंतवणूकदार विक्री करू लागले आहेत. जागतिक बाजारात आज संमिश्र वातावरण होते. चीन, दक्षिण कोरिया आणि जपानच्या शेअर बाजार निर्देशांकात थोडी वाढ झाली. युरोपीयन शेअर बाजारातही संमिश्र वातावरण होते. सरलेल्या आठवड्यांत सेन्सेक्स 589 अंकांनी तर निफ्टी 170 अंकांनी वाढला. आज निर्देशांक मोठ्या प्रमाणात कमी झाल्यामुळे व ऊर्जा, ग्राहक वस्तू, बॅंकिंग, आरोग्य क्षेत्राचे निर्देशांक 2.30 टक्क्यांपर्यंत कोसळले. मिड कॅप आणि स्मॉल कॅप मात्र कालच्या पातळीवर कायम राहिले. परदेशी संस्थागत गुंतवणूकदारांनी काल 909 कोटी रुपयाच्या शेअरची विक्री केली.
गुंतवणूकदारांचे पतधोरणाकडे लक्ष्य
वाढलेली महागाई आणि नव्या करोनाने निर्माण केलेल्या प्रश्नाच्या पार्श्वभूमीवर पुढील आठवड्यात रिझर्व बॅंक आपले पतधोरण जाहीर करणार आहे. अमेरिकेच्या रिझर्व बॅंकेने या अगोदरच व्याजदरात वाढ करण्याचे संकेत दिले आहेत. भारतीय रिझर्व बॅंकेने गेल्या दोन वर्षापासून मवाळ पतधोरण जारी केले आहे. महागाई पाच टक्क्यांच्या पुढे गेल्यामुळे रिझर्व बॅंकेला व्याजदर वाढविण्यावर विचार करावा लागणार आहे. त्यामुळे पुढील आठवड्यात रिझर्व्ह बॅंकेची पतधोरण समिती या विषयावर काय निर्णय घेते याकडे गुंतवणूकदारांचे लक्ष आहे.