कराची – भारताचा उपकर्णधार रोहित शर्मा हाच माझा आदर्श असल्याचे पाकिस्तानचा नवोदीत फलंदाज हैदर अली याने सांगितले आहे. रोहितने भारतीय संघातील स्थान केवळ निश्चित केले नाही तर त्याने आपल्या खेळाने कसोटी क्रिकेटमध्येही नाव उंचवायला सुरुवात केली आहे. त्याच्या फलंदाजीचे तंत्र, गोलंदाजीतील कमकुवत दुवे ओळखण्याचे त्याचे कसब यांमुळे मी प्रभावीत झालो. त्याच्यासारखी फलंदाजी करण्याचा मी नेहमी प्रयत्न करतो, असेही हैदर म्हणाला.
गेल्या दीड वर्षांत रोहितच्या फलंदाजीत परिपक्वता आली आहे. त्याचाच मी फॅन झालो. सुरवातीला रोहित केवळ मर्यादीत षटकांच्या सामन्याचा फलंदाज वाटत असे मात्र, नंतर त्याने कसोटीतही आपली गुणवत्ता सिद्ध केली. सामना टी-20, एकदिवसीय किंवा कसोटी असो रोहित त्याच शैलीने फलंदाजी करतो. तो खेळपट्टीवर आला की आपले वर्चस्व प्रस्थापीत करतो. प्रतिस्पर्धी संघातील कोणत्या गोलंदाजाला लक्ष्य करायचे तसेच धावांचा वेग वाढवताना बाद न होता कमीतकमी जोखिम पत्करुन आक्रमक फलंदाजी कशी करायची हे मी रोहितची फलंदाजी पाहुन शिकलो, असेही हैदरने सांगितले.