नवी दिल्ली – आत्तापर्यंत केवळ उत्तरप्रदेश पुरताच राजकारणाशी संबंध असलेल्या कॉंग्रेस नेत्या प्रियांका गांधी यांनी आता याही पेक्षा व्यापक स्वरूपात राजकीय जबाबदारी स्वीकारण्याचा संकेत दिला असून त्या उद्या पासून आसामच्या निवडणूक प्रचार दौऱ्यावर जात आहेत.
उत्तरप्रदेशच्या बाहेर निवडणूक प्रचार दौऱ्यासाठी जाण्याचा त्यांचा हा पहिलाच प्रसंग आहे. त्या आपल्या आसाम दौऱ्याची सुरूवात गुवाहाटी येथील कामाख्य मंदिराच्या दर्शनाने करणार आहेत. तेथून त्या लखीमपुरला जाणार असून तेथे त्यांची पहिली निवडणूक प्रचारसभा होणार आहे. ब्रम्हपुत्रेच्या उत्तरेकडील जिल्हे हा भाजपचा प्रभाव असलेले क्षेत्र मानले जाते. त्या भागातही त्यांच्या मोठ्या प्रमाणात प्रचार सभांचे आयोजन करण्यात आले आहे.
भिपुरिया आणि तेजपुर येथेही त्यांच्या प्रचार सभा होणार आहेत. बिश्वनाथ येथे त्या चहाच्या मळ्यात काम करणाऱ्या मजुरांशीही चर्चा करणार आहेत. अप्पर आसाम येथे मोदींचे अलिकडच्या काळात मोठ्या प्रमाणात प्रचार दौरे झाले आहेत त्या क्षेत्रात जाऊनही त्या प्रचार करणार आहेत.