मुंबई: सत्ताबदलानंतर पहिल्यांदाच उपमुख्यमंत्री एकनाथ शिंदे आणि शिवसेना (उद्धव बाळासाहेब ठाकरे) नेते आदित्य ठाकरे यांची मुंबईतील रस्ते कामांच्या बैठकीत आमनेसामने भेट झाली. या बैठकीचा एक व्हिडीओ सोशल मीडियावर व्हायरल झाला असून, त्यातून दोघांमधील तणाव स्पष्ट दिसून आला आहे.
व्हायरल व्हिडीओत काय दिसलं?
व्हिडीओत एकनाथ शिंदे बैठकस्थळी दाखल होताच सर्व आमदारांनी उभं राहून त्यांचं स्वागत केलं. मात्र, आदित्य ठाकरे आपल्या खुर्चीवर बसूनच राहिले. त्यानंतर ते शिंदेंच्या समोरच्या खुर्चीवर बसले आणि एकटक त्यांच्याकडे पाहत राहिले. दुसरीकडे, एकनाथ शिंदेंनी त्यांच्याकडे नजर टाकली नाही. ही सारी घटना कॅमेऱ्यात टिपली गेली आणि त्यावरून राजकीय वर्तुळात चर्चांना उधाण आलं आहे.
बैठकीत नेमकं काय घडलं?
मुंबईतील रस्त्यांच्या सिमेंट क्रॉंक्रिटीकरणाच्या कामांवर आर्थिक गुन्हे शाखेमार्फत चौकशी व्हावी, अशी मागणी आदित्य ठाकरे यांनी केली. ही मागणी त्यांनी एकनाथ शिंदे आणि विधानसभा अध्यक्षांसमोर ठेवली होती. तसेच, मुख्यमंत्री देवेंद्र फडणवीस यांच्याकडेही ही चौकशीची मागणी लावून धरणार असल्याचं त्यांनी सांगितलं.
एकनाथ शिंदे यांनी बैठकीत रस्ते कामांचा आढावा सादर केला. त्यांनी दिलेल्या माहितीनुसार, टप्पा १ मधील २३ टक्के काम पूर्ण झालं आहे, तर टप्पा २ मध्ये फक्त ०.५ टक्के काम झालं आहे. रस्त्यांच्या कामाचा दर्जा, मुदतीत काम पूर्ण होणार की नाही आणि समन्वयातील अडचणी यावर आमदारांनी प्रश्न उपस्थित केले. भाजप आमदार आशिष शेलार यांनीही आपल्या मतदारसंघातील रस्ते कामांच्या समस्यांवर भाष्य केलं.
रस्ते कामांसाठी नवे निर्देश –
मुंबई महापालिका आयुक्तांनी यापूर्वीच ३१ मे पर्यंत सुरू असलेली सर्व रस्ते कामं पूर्ण करण्याचे आदेश दिले आहेत. बैठकीत आमदारांनी सूचना मांडली की, १५ मीटरपेक्षा कमी रुंदीचे छोटे रस्ते सिमेंट क्रॉंक्रिटीकरणाऐवजी अस्फॉल्टने बनवावेत, जेणेकरून काम जलद होईल.
दरम्यान, सत्ताबदलानंतर शिंदे आणि ठाकरे गटातील संघर्ष सर्वश्रुत आहे. या बैठकीत दोन्ही नेते पहिल्यांदा समोरासमोर आल्याने राजकीय निरीक्षकांच्या भुवया उंचावल्या आहेत. आदित्य ठाकरे यांनी शिंदेंकडे एकटक पाहणं आणि शिंदेंचं त्याकडे दुर्लक्ष करणं यामुळे ही भेट चर्चेचा विषय ठरली आहे. रस्ते कामांच्या मुद्द्यावरून सुरू झालेली ही बैठक राजकीय टकमकीचं नवं प्रकरण बनली.
