Nashik Plot Scam : नाशिकमध्ये सुमारे ३०० कोटी रुपयांचा मोठा भूखंड घोटाळा उघडकीस आला असून या प्रकरणात ४९ बांधकाम व्यावसायिकांविरुद्ध गुन्हे दाखल करण्यात आले आहेत. हा घोटाळा म्हाडाच्या घर योजनेशी संबंधित असल्याचे समोर आले आहे. या योजनेतील नियमांमधील पळवाटा शोधत काही बांधकाम व्यावसायिकांनी मोठ्या प्रमाणात गैरव्यवहार केल्याचे चौकशीत उघड झाले आहे. नियमांनुसार चार हजार चौरस मीटरपेक्षा मोठ्या प्रकल्पांमध्ये आर्थिकदृष्ट्या दुर्बल घटकांसाठी किमान २० टक्के घरे राखीव ठेवणे बंधनकारक आहे. मात्र हा नियम टाळण्यासाठी काही बांधकाम व्यावसायिकांनी प्रकल्पातील जागेचे कृत्रिम विभाजन केले. काही ठिकाणी लहान गाळे दाखवून प्रकल्पाचे क्षेत्र कमी असल्याचे दाखवण्यात आले, तर काही प्रकरणांत भूखंडांचे विभाजन करून नियमांनाच बगल देण्यात आली. या संदर्भात जिल्हाधिकाऱ्यांच्या आदेशानुसार चौकशी करण्यात आली. या चौकशीत मोठ्या प्रमाणात गैरव्यवहार झाल्याचे समोर आल्यानंतर संबंधित ४९ बांधकाम व्यावसायिकांविरुद्ध गुन्हे नोंदवण्यात आले. या प्रकरणात शहरातील म्हसरूळ, वडनेर दुमाला, देवळाली, आडगाव, आगरटाकळी, विहीतगाव, नाशिक, नांदूर दसक, पंचक, गंगापूर आणि चेहडी या भागांतील एकूण १०८ प्रकरणांची तपासणी तहसीलदारांनी केली. या प्रकरणांची पडताळणी भूमी अभिलेख तसेच नगर भूमापन अधिकाऱ्यांच्या कार्यालयामार्फत करण्यात आली. तपासणीदरम्यान ४९ प्रकरणांमध्ये प्रत्यक्षात पोटहिस्सा मोजणी झालेली नसतानाही ती झाल्याचे भासवून बनावट मोजणी नकाशे तहसील कार्यालयात सादर करण्यात आल्याचे आढळून आले. या प्रकरणात केवळ बांधकाम व्यावसायिकच नव्हे तर काही अधिकारी व कर्मचारी यांच्या संगनमताशिवाय असा प्रकार शक्य नसल्याची चर्चा सुरू आहे. त्यामुळे या घोटाळ्यात सहभागी असलेल्या प्रशासनातील संबंधित अधिकाऱ्यांवरही कारवाई होणार का, असा प्रश्न उपस्थित होत आहे.