सातारा (प्रतिनिधी)- पंतप्रधान नरेंद्र मोदी यांच्या कराडमध्ये होणाऱ्या सभेच्या वेळेत बदल करण्यात आला आहे. कराड येथे 30 एप्रिल रोजी होणारी सभा आता सैदापूर (कराड) येथे सोमवारी दि. 29 एप्रिल रोजी दुपारी दोन वाजता होणार आहे. पुणे व बारामती येथील सभांची व्यस्तता लक्षात घेऊन हा बदल करण्यात आला आहे. जिल्ह्याचे पालकमंत्री शंभूराज देसाई यांच्या अध्यक्षतेखाली या सभेचे नियोजन करण्यात येत आहे.
खासदार उदयनराजे भोसले यांच्या प्रचारासाठी नरेंद्र मोदी येत असून संपूर्ण जिल्ह्यासह महाराष्ट्राचे लक्ष नरेंद्र मोदी यांच्या सभेकडे लागून राहिले आहे. सातारा लोकसभा मतदारसंघात भाजपचे उदयनराजे भोसले विरुद्ध राष्ट्रवादी काँग्रेस शरदचंद्र पवार पक्षाचे शशिकांत शिंदे यांच्यात चुरशीची लढत होत आहे भारतीय जनता पक्षाने उदयनराजे भोसले यांचा प्रचार जोरदार व्हावा यासाठी पंतप्रधान नरेंद्र मोदी यांच्या विशेष सभेचे आयोजन केले आहे.
सैदापूर येथील सभेस एक लाखापेक्षा अधिक लोक येतील असे नियोजन करण्यात येत आहे. मात्र, ही सभा दुपारी दोन वाजता असल्याने दुपारच्या रणरणत्या उन्हाची झळ बसण्याची शक्यता आहे. 2019 च्या पोटनिवडणुकीत खासदार उदयनराजे भोसले यांच्या प्रचारासाठी पंतप्रधान मोदी साताऱ्यात आले होते. त्यावेळी सातारा सैनिक स्कूलच्या मैदानावर त्यांची सभा झाली होती.
राज्यसभेचे खासदार असणारे उदयनराजे लोकसभेसाठी पुन्हा रणांगणात उतरले आहेत. त्यामुळे उदयनराजेंसाठी सातारकरांना साद घातली जाणार असून पंतप्रधान नरेंद्र मोदी सभेत काय बोलणार, हा उत्सुकतेचा विषय आहे. पुणे आणि बारामती या सभांची वेळ व प्रवासाचे अंतर या गोष्टी लक्षात घेऊन 30 एप्रिल ऐवजी 29 एप्रिल रोजी ही सभा होणार असल्याचे स्पष्ट करण्यात आले आहे.
सभा परिसरात मोठा बंदोबस्त
पालकमंत्री शंभूराज देसाई तसेच भाजप कार्यकारिणीचे निवडणूक प्रभारी अतुल भोसले, प्रदेश उपाध्यक्ष विक्रम पावसकर इत्यादी मान्यवरांनी सैदापूर येथील सभास्थळाची पाहणी केली. पोलीस अधीक्षक समीर शेख यांनी पंतप्रधान नरेंद्र मोदी यांचा दौरा लक्षात घेऊन तेथे एक सीआरपीएफ कंपनी तसेच जलद प्रतिसाद पथक आणि साडेसातशे पोलिसांचा बंदोबस्त तैनात केला आहे.
