पिंपरी : खुनातील एका आरोपीची तब्‍बल सात वर्षांनी जामिनावर सुटका झाली. तो निगडीतील घरी आल्‍यावर त्‍याच्‍या साथीदारांनी फुलांची उधळण आणि फटाक्‍याची आतषबाजी करीत जोरदार स्वागत केले आहे. शाम यत्‍नाळकर (रा. त्रिवेणीनगर, तळवडे, निगडी) असे जामिनावर सुटका झालेल्‍या आरोपीचे नाव आहे.
सातारा येथील एका खून प्रकरणात तो आरोपी आहे. तो गेली सात वर्ष तुरूंगात होता. नुकताच त्‍याला जामीन मंजूर झाल्‍यावर तो त्रिवेणीनगर येथील घरी रात्री आठ वाजताच्‍या सुमारास आला. त्‍यावेळी त्‍याच्‍या साथीदारांनी त्‍याच्‍यावर फुलांची उधळण केली. तसेच फटाके वाजवून त्‍याचे स्वागत केले. खुनातील आरोपीचे जंगी स्वागत पाहून परिसरातील नागरिकांमध्‍ये भितीचे वातावरण आहे.
याबाबतची माहिती मिळताच निगडी पोलीस त्‍याच्‍या घरी गेले. मात्र जंगी स्‍वागतानंतर कोणते नवीन संकट यायला नको म्हणून आरोपीने तिथून पळ काढला. पोलिसांनी त्‍याच्‍या नातेवाइकांच्‍या माध्यमातून त्‍याच्‍याशी संपर्क साधून त्‍याला निगडी पोलीस ठाण्‍यात येण्‍याबाबत समज दिली आहे. तसेच स्‍वागतासाठी कोण-कोण होते याचीही पोलीस चौकशी करत आहेत.
