नागपूर – मुंबईतील करोना परिस्थिती चिंताजनक होत चालली आहे. गेल्या काही दिवसांपासून मुंबईतील रुग्णसंख्येत झपाट्याने वाढ होताना दिसत आहे. मात्र, गुरुवारी रुग्णसंख्येचा विस्फोट झाला. मुंबई एकाच दिवसात ८ हजार ६४६ नवीन रुग्ण आढळून आले आहेत. त्यामुळे ठाकरे सरकारने निर्बंध कडक करण्याचे संकेत दिले आहेत. अशातच लोकल बंद होणार का? हा प्रश्न मुंबईकरांना पडला असून राज्याचे मदत आणि पुनर्वसन मंत्री विजय वडेट्टीवार यांनी यासंबंधी महत्वाची माहिती दिली आहे.
विजय वडेट्टीवार म्हणाले कि, राज्यात करोनाचा प्रादुर्भाव लक्षात घेता लॉकडाऊन नाही तर आणखी कडक निर्बंध लावले जातील. गुरुवारी नव्याने धोरणात्मक निर्णय घेण्यासाठी मुख्यमंत्र्यांकडे आमच्या विभागाकडून फाईल गेली आहे. अंतिम निर्णय आज संध्याकाळपर्यंत होईल, असे त्यांनी सांगितले.
तर, लोकल बंद होणार का असा प्रश्न विचारला असता वडेट्टीवार म्हणाले, लोकल बंद होणार नाही, पण त्यावर निर्बंध लावले जातील आणि त्याचे वेगळ्या पद्धतीने नियोजन केले जाईल. गर्दी कमी करुन लोकांना सुविधा देण्यावर भर असेल.
दरम्यान, मुंबईतील लोकल प्रवासावरही निर्बंध आणले जाऊ शकतात. पूर्वीप्रमाणेच फक्त अत्यावश्यक सेवेतील कर्मचाऱ्यांनाच प्रवासासाची मूभा दिली जाऊ शकते. त्याचबरोबर लोकांकडून करोना नियमावलीचे पालन केले जात नसल्याने मॉल्स आणि थिअटर बंद करण्याचा निर्णय घेतला जाऊ शकतो, असेही महापौर पेडणेकर यांनी यांनी सांगितले. नव्या निर्बंधासंदर्भातआज निर्णय घेतला जाणार आहे.