Shivraj Motegaonkar : नीट पेपर फुटीप्रकरणात दिवसेंदिवस मोठे खुलासे होत आहेत. या प्रकरणातील सर्वात महत्त्वाचा आरोपी शिवराज मोटेगावकरला सीबीआयने पुण्यातून अटक केली आहे. ‘रेणुकाई करिअर सेंटर’ (RCC)चा संचालक असून मुलासाठी त्याने पेपर विकत घेतल्याचा आरोप केला जात आहे. मोटेगावकरची सध्या चौकशी सुरु असून यातच त्याचा एक धक्कादायक व्हिडिओ समोर आला आहे. व्हिडिओत पाहायला मिळते की, मोटेगावकर चक्क वर्गातील डेक्सवर उभे असल्याचे दिसत असून त्यांच्या एका हातात पाण्याचा तांब्या आणि दुसऱ्या हातात आंब्याची पाने आहेत. ते या आंब्याच्या पानांनी तांब्यातील पाणी समोर बसलेल्या विद्यार्थ्यांच्या अंगावर शिंपडत आहेत. एवढेच नाही तर, पाणी शिंपडताना ते विद्यार्थ्यांना उद्देशून म्हणत आहेत की, तुम्ही एम्समध्ये लागणार आहात आणि हा योग खूप वर्षानंतर आला आहे. विज्ञानाचा प्राध्यापकच अंधश्रद्धेच्या आहारी हा व्हिडिओ सोशल मीडियावर मोठ्या प्रमाणात व्हायरल होत असून, अनेकांकडून संताप व्यक्त केला जात आहे. विद्यार्थ्यांच्या भविष्याशी संबंधित गंभीर प्रश्न उपस्थित असताना मोटेगावकर तंत्र-मंत्र किंवा अंधश्रद्धेसारख्या गोष्टींचा आधार घेत होते का? असा सवालही उपस्थित केला जात आहे. तसेच विज्ञानाचा प्राध्यापकच अंधश्रद्धेच्या आहारी गेल्याचे पाहायला मिळत आहे. तसेच देशाचे भावी डॉक्टर घडवण्याची जबाबदारी असलेल्या एका प्राध्यापकानेच अशा प्रकारे पाणी शिंपडून अंधश्रद्धेच्या आहारी जात यश विद्यार्थांमध्ये चुकीच्या गोष्टी पेरत असल्याचे दिसत आहे. ‘मनीषा कनेक्शन’ची चर्चा दरम्यान, NEET पेपरफुटी प्रकरणातील तपास सीबीआयकडून वेगाने सुरू असून, लातूरमधील काही डॉक्टर, पालक आणि विद्यार्थ्यांचीही चौकशी सुरू असल्याची माहिती समोर येत आहे. अलिकडेच पुण्यातील प्रसिद्ध शेठ हिरालाल सराफ प्रशालेच्या मुख्याध्यापिका मनीषा संजय हवालदार यांना शुक्रवारी अटक करण्यात आली. या प्रकरणात पुण्यात झालेली ही सीबीआयची पाचवी अटक असून, विशेष म्हणजे आतापर्यंत अटक झालेल्या तीन महिला आरोपींचे नाव ‘मनीषा’ असल्याने तपास यंत्रणांमध्येही या ‘मनीषा कनेक्शन’ची चर्चा रंगली आहे. त्यामुळे तिन्ही महिला आरोपींची नावे एकच आहेत हा निव्वळ योगायोग आहे की यामागे आणखी काही वेगळे कनेक्शन आहे, अशी शंका उपस्थित केली जात आहे. आतापर्यंत ११ आरोपींना अटक या पेपरफुटी प्रकरणाचा तपास देशभरात सुरू असून, सीबीआयने पुणे, जयपूर, गुरुग्राम, नाशिक, लातूर, दिल्ली आणि अहिल्यानगरसह अनेक शहरांमध्ये छापेमारी केली आहे. आतापर्यंत ११ आरोपींना अटक करण्यात आली असून, आरोपींकडून लॅपटॉप, मोबाईल, हार्ड डिस्क, बँक व्यवहारांची कागदपत्रे आणि अन्य इलेक्ट्रॉनिक साहित्य जप्त करण्यात आले आहे. तपास पुढे जात असताना आणखी काही प्राध्यापक आणि क्लास चालकांची नावे समोर येण्याची दाट शक्यता व्यक्त केली जात आहे. हेही वाचा: Rohit Pawar: “पेपरफुटी, इंधन तुटवडा, महागाई, महिला अत्याचार सर्वत्र विचित्र परिस्थिती…”; रोहित पवारांचा सरकारवर हल्लाबोल
