अकोला : मागच्या काही दिवसांपासून सुरु राष्ट्रवादीचे आमदार अमोल मिटकरी आणि मनसे यांच्यातील वाद काही थांबायचे नाव घेईना. या प्रकरणात आता दोन्ही पक्षाकडून जोरदार आरोप-प्रत्यारोप केले जात आहेत. यादरम्यान अमोल मिटकरी यांच्या टीकेला उत्तर देत मनसे जिल्हाध्यक्ष पंकज साबळे यांनी जोरदार पलटवार केला आहे.
काय म्हणाले पंकज साबळे?
आमदार मिटकरींची तुलना त्यांनी राखी सावंत हिच्याशी केलीय. मिटकरी हे राजकारणातील राखी सावंत असल्याचे साबळे यांनी म्हटले आहे. आमच्या नेत्याला पळकुटा म्हणणारे मिटकरीच राडयाच्या दिवशी अकोला विश्रागृहाच्या बाथरूममध्ये लपले असल्याचं साबळे म्हणाले आहेत. जय मालोकार यांच्या मृत्यूचा आज दहावा दिवसही झाला नसताना मिटकरी त्याच्या मृत्युचं राजकारण करत आहेत असंही मनसे जिल्हाध्यक्ष साबळे म्हणाले आहेत.
20 पेक्षा अधिक लोकांवर गुन्हे दाखल
आमदार अमोल मिटकरींच्या वाहन तोडफोड प्रकरणातील संशयित आरोपी असलेले दुसरे जिल्हाध्यक्ष राजेश काळे आणि पदाधिकारी सचिन गव्हाळे यांना अटक करण्यात आली आहे. अकोल्यातील सरकारी बगीचाजवळून त्यांना ही अटक करण्यात आलीय. या प्रकरणात आतापर्यत पोलिसांनी 7 जणांना अटकेत घेतले आहे. तर तिघांना या प्रकरणात जामिन मिळाला आहे. आतापर्यंत या प्रकरणात 20पेक्षा अधिक मनसेच्या लोकांवर गुन्हे दाखल झाले आहेत.
