किव्ह : रशिया आणि युक्रेन यांच्यातील युद्ध काही केल्या संपत नसल्याचे दिसत नाही. कारण रशियाने युक्रेनवर तब्बल ५५ क्षेपणास्त्रे आणि ड्रोनद्वारे हल्ला करण्यात आला असल्याचे सांगण्यात येत आहे. या हल्ल्यात युक्रेनमधील ११ नागरिकांचा मृत्यू झाला आहे, तर इतर ११ जण गंभीर जखमी झाल्याची माहिती समोर येत आहेत.
जर्मनी आणि अमेरिकेने युक्रेनमध्ये रणगाडे पाठवण्याची घोषणा केल्याच्या एका दिवसानंतर लगेच रशियाकडून हा हल्ला करण्यात आला. एका वृत्तसंस्थेने दिलेल्या वृत्तानुसार, गुरुवारी रशियाने युक्रेनवर डागलेल्या ५५ क्षेपणास्त्रांमुळे राजधानी किव्ह आणि आजुबाजुच्या परिसरात मोठे नुकसान झाले आहे. तसेच या हल्ल्यात ११ युक्रेनियन नागरिकांचा मृत्यू झाला असून इतर ११ जण गंभीर जखमी झाले आहेत.
युक्रेनच्या राज्य आपत्कालीन सेवेचे प्रवक्ते अॅलेक्झांडर खोरुन्झी यांनीही ११ जणांच्या मृत्यूची पुष्टी केली आहे. तसेच रशियाने डागलेल्या ५५ क्षेपणास्त्रांपैकी ४७ क्षेपणास्त्र पाडल्याचा दावा त्यांनी केला आहे.
दरम्यान, रशियाने युक्रेनवर केलेल्या हल्ल्याचा अमेरिकेकडून निषेध करण्यात आला आहे. अमेरिकेच्या परराष्ट्र मंत्रालयाने गुरुवारी झालेल्या पत्रकार परिषदेत युक्रेनवरील हल्ल्याचा निषेध करत मृत्यू झालेल्यांच्या कुटुंबियांविषयी संवेदना व्यक्त केल्या आहेत. यूएस स्टेट डिपार्टमेंटचे प्रवक्ते वेदांत पटेल, यांनी यासंदर्भात ही माहिती दिली आहे.
