MP Salary Hike: केंद्र सरकारने खासदार आणि माजी खासदारांच्या वेतन, दैनिक भत्ता आणि पेन्शनमध्ये वाढीची अधिकृत अधिसूचना जारी केली आहे. संसदीय कार्य मंत्रालयाच्या म्हणण्यानुसार, ही वाढ १ एप्रिल २०२३ पासून लागू होईल. मोदी सरकारने महागाई लक्षात घेऊन संसद सदस्य वेतन, भत्ता आणि पेन्शन कायदा, १९५४ अंतर्गत हे बदल केले आहेत.
किती वाढला पगार आणि भत्ता?
यापूर्वी खासदारांना १,००,००० रुपये मासिक वेतन मिळत होते, ते आता १,२४,००० रुपये करण्यात आले आहे. दैनिक भत्ताही २,००० वरून २,५०० रुपये झाला आहे. खासदार आणि माजी खासदारांची मासिक पेन्शन २५,००० वरून ३१,००० रुपये झाली आहे. याशिवाय, अतिरिक्त पेन्शन २,००० वरून २,५०० रुपये प्रति महिना करण्यात आली आहे.
Central government has notified the increase in the salary, daily allowance, pension and additional pension of Members of Parliament (MPs) and Ex-Members of Parliament, which will be effective from April 1, 2023
The monthly salary has been increased from 1 lakh to Rs 1.24 lakh.… pic.twitter.com/ANYj7qiCYA
— ANI (@ANI) March 24, 2025
शेवटचे बदल कधी झाले?
संसदेच्या चालू अर्थसंकल्पीय अधिवेशनात हे संशोधन जाहीर झाले. यापूर्वी खासदारांच्या वेतन, भत्ता आणि पेन्शनमध्ये एप्रिल २०१८ मध्ये बदल झाले होते. या वाढीमुळे सरकारी तिजोरीवर आर्थिक भार पडण्याची शक्यता आहे, कारण ५४३ लोकसभा खासदार, २४५ राज्यसभा खासदार आणि अनेक माजी खासदारांना याचा लाभ मिळेल.
खासदारांना आणखी काय सुविधा?
वेतन आणि भत्त्याव्यतिरिक्त, खासदारांना मतदारसंघात कामासाठी दरमहा ७०,००० रुपये निर्वाचन क्षेत्र भत्ता आणि कार्यालयीन खर्चासाठी ६०,००० रुपये मिळतात. यात कर्मचाऱ्यांचा पगार, फोन आणि स्टेशनरीचा समावेश आहे. तसेच, खासदारांना स्वतः आणि कुटुंबासाठी दरवर्षी ३४ मोफत हवाई प्रवासाची सुविधा मिळते. जे सरकारी निवास घेत नाहीत, त्यांना २ लाख रुपये मासिक निवास भत्ता मिळतो. याशिवाय, ५०,००० युनिट मोफत वीज, कुटुंबासाठी केंद्रीय आरोग्य योजनेअंतर्गत आरोग्य सुविधा अशा अनेक सवलतीही त्यांना मिळतात.
खासदारांसाठी ही वाढ आनंदाची बातमी ठरली असून, यामुळे त्यांच्या आर्थिक सुविधांमध्ये लक्षणीय सुधारणा होणार आहे.
