सातारा – सातारा पालिका आणि मेढा नगरपंचायत अशा दोन वेगवेगळ्या फाईल्स नगर विकास विभागाकडे गेल्या होत्या. नगर विकास विभागाकडून सातारा पालिकेची फाईल आधी पोहोचली. त्यामुळे त्यावर आधी स्वाक्षरी झाली. मेढा नगरपंचायतीची फाईल सुद्धा मुख्यमंत्र्याच्या स्वाक्षरीसाठी सादर झालेली आहे. त्यामुळे येत्या दोन-तीन दिवसात वाढीव कर आकारणी सुनावणी स्थगित केल्याचे आदेश निघतील. ही एक प्रशासकीय कार्यालयीन प्रक्रिया आहे. मी दिलेला शब्द पूर्ण करणारा आमदार आहे, हे समस्त जावलीकर जाणतात. त्यामुळे अमित कदमांनी फुकटची काळजी दाखवू नये, असा टोला आमदार शिवेंद्रसिंहराजे भोसले यांनी लगावला आहे.
याबाबत प्रसिध्दीस दिलेल्या पत्रकात म्हटले आहे की, सातारा नगर पालिकेप्रमाणेच मेढा नगरपंचायतीच्या करवाढ आकारणीस स्थगिती देण्याची मागणी मुख्यमंत्री एकनाथ शिंदे यांच्याकडे पूर्वीच केली होती. मुख्यमंत्र्यांनी त्याचवेळी सातारा प्रमाणेच मेढा नगरपंचायतीच्या चतुर्थ वार्षिक कर आकारणीस स्थगिती देण्याच्या तोंडी सूचना संबंधित अधिकाऱ्यांना केल्या होत्या आणि त्यावेळेपासून सदरची प्रक्रिया थांबली आहे. शासनाकडून अधिकृत आदेश मिळण्यासाठी सातारा पालिका आणि मेढा नगरपंचायत असे दोन स्वतंत्र प्रस्ताव नगर विकास विभागाकडे दाखल करण्यात आले होते. दोन वेगवेगळ्या फाईल्स होत्या त्यात नगरविकास विभागाकडून सातारा पालिकेची फाईल आधी पोहचली. मेढा नगरपंचायतीची फाईलही नगरविकास विभागाकडून मुख्यमंत्र्यांकडे स्वाक्षरीसाठी पाठवण्यात आली आहे. ही एक प्रशासकीय कार्यालयीन प्रक्रिया आहे. त्यानुसार येत्या दोन- तीन दिवसात याही फाईलवर स्वाक्षरी होईल.
