मराठा आरक्षणाची सुनावणी पूर्ण; आता सुप्रीम कोर्टाच्या निकालाकडे लक्ष

नवी दिल्ली  – सर्वोच्च न्यायालयात मराठा आरक्षणासंदर्भात घटनात्मक पीठासमोर सुरू असलेले युक्तिवाद पूर्ण झाले आहेत. सलग दहा दिवस देशाच्या सर्वोच्च न्यायालयात मराठा आरक्षणावरून सुरु युक्तिवाद होते. 102व्या घटना दुरुस्तीनुसार राज्यांना आरक्षणाचे अधिकार आहेत की नाहीत, 50 टक्के आरक्षणाच्या मर्यादेबाबत इंद्रा साहनीसह आणि निकालाचे पुनर्विलोकन आवश्‍यक आहे की नाही, याबाबत युक्तिवाद करण्यात आले. आता सर्वोच्च न्यायालयाच्या घटनात्मक पीठाने निकालाची तारीख राखून ठेवली आहे. महाराष्ट्राच्या दृष्टीने सर्वात संवेदनशील अशा मराठा आरक्षण प्रकरणाच्या निकालाकडे महाराष्ट्रासह देशाचे लक्ष लागले आहे.

सर्वोच्च न्यायलयाकडून महाराष्ट्र राज्यात मराठा समाजाला नोकरी त्याचप्रमाणे शिक्षणात दिल्या जाणाऱ्या आरक्षणाच्या घटनात्मक वैधतेला आव्हान देणाऱ्या याचिकांवर सुप्रीम कोर्टात सुनावणी सुरू आहे. आज कोर्टामध्ये सॉलिसिटर जनरल तुषार मेहता आणि ए. जी. वेणुगोपाल यांनी आपला युक्तीवाद पूर्ण केला. यानंतर मराठा आरक्षण प्रकरणी सुप्रीम कोर्टाने निर्णय राखून ठेवला आहे. होळीनंतर निर्णय घोषित होण्याची शक्‍यता वर्तवली जात आहे.

गेल्या 10 दिवसांपासून सुरू असलेली मराठा आरक्षणाची सुनावणी आज संपली. मराठा आरक्षणाच्या बाजूने आम्ही सुप्रीम कोर्टासमोर चांगले मुद्दे मांडले आहेत. त्यामुळे मराठा आरक्षण सुप्रीम कोर्टाकडून कायम ठेवले जाईल अशी अपेक्षा आहे. सुनावणी संपली असली तरी निकाल कधी येईल हे सांगणे कठीण आहे. मात्र आता मराठा आरक्षणाचा सोक्षमोक्ष होईल, अशी भावना याचिकाकर्ते विनोद पाटील यांनी मांडली आहे.

डिजिटल प्रभात आता टेलिग्रामवर! चॅनल जॉईन करा व मिळवा सर्व महत्वपूर्ण अपडेट्स, चॅनल जॉईन करण्यासाठी येथे क्लिक करा

You might also like

Leave A Reply

Your email address will not be published.