नवी दिल्ली – आयफोनसोबत बॉक्‍समध्ये चार्जर न दिल्याने ऍपलवर अनेकदा कारवाई झाली परंतु कंपनीला दंड भरायला जास्तच आवडते कि काय ? असा प्रश्न आता निर्माण झाला आहे. कारण एका देशातील सरकारने शेकडो आयफोन जप्त केले आहेत. फोनसोबतच्या बॉक्‍समध्ये चार्जर दिलेला नसल्याचं कारण देत सरकारने हे पाऊल उचलले आहे. कोणत्याही गॅझेटसोबत चार्जर ही अत्यंत महत्त्वची ऍक्‍सेसरी आहे आणि तो ग्राहकाचा हक्कही आहे, असे ब्राझील सरकारचे मत आहे.
ऍपलवर ब्राझील सरकारने केलेली ही पहिली कारवाई नाही. याआधीही ऍपलला आयफोनसोबत चार्जर न दिल्याने दोनदा दंड ठोठावण्यात आला आहे. एका इंग्रजी वृत्तांसुर, ब्राझील सरकारने अनेक ऍपल स्टोअर्समधील आयफोन जप्त केले आहेत आणि या कारवाईला ऑपरेशन डिस्चार्ज असे नाव देण्यात आले आहे. ऍपलच्या सर्व अधिकृत स्टोअरमध्ये ही कारवाई करण्यात आली आहे.
गेल्या महिन्यात, ऍपलला ब्राझीलमध्ये चार्जरशिवाय आयफोन विकल्याबद्दल सुमारे 164 कोटी रुपयांचा दंड ठोठावण्यात आला होता. ब्राझीलच्या न्यायाधीशांनी सांगितले की ऍपलने ग्राहकांना आयफोनसह चार्जर न देऊन अतिरिक्त उत्पादन खरेदी करण्यास भाग पाडले.म्हणून हा निर्णय घेण्यात आला आहे.
