ST Bus Accident : मुरबाड-माळशेज घाट महामार्गावर वैशाखरे वळणाजवळ मंगळवारी (५ मे) सकाळी सुमारे ११ वाजता एसटी बस आणि स्कॉर्पिओची समोरासमोर धडक होऊन भीषण अपघात झाला. या दुर्घटनेत नेवासे तालुक्यातील चार जणांचा जागीच मृत्यू झाला असून, परिसरात शोककळा पसरली आहे. (ST Bus Accident) मृतांमध्ये वडाळा (बहिरोबा) येथील मामा-भाचे अविनाश काकडे आणि अभिषेक मोटे, तसेच भेंडा येथील अंगणवाडी सेविका मीना कल्याण मडके आणि नीता अशोक डुरे यांचा समावेश आहे. दोन महिला आणि दोन पुरुष अशा चौघांचा या अपघातात दुर्दैवी अंत झाला. (ST Bus Accident) मिळालेल्या माहितीनुसार, हे सर्वजण आजारी नातेवाईकाला भेटण्यासाठी जात असताना काळाने त्यांच्यावर घाला घातला. वैशाखरे वळणावर ओव्हरटेक करण्याच्या प्रयत्नात स्कॉर्पिओ आणि एसटी बस यांच्यात जोरदार धडक झाली. अपघात इतका भीषण होता की दोन्ही वाहनांच्या पुढील भागाचा अक्षरशः चक्काचूर झाला. (ST Bus Accident) घटनेची माहिती मिळताच टोकावडे महामार्ग पोलिसांनी तात्काळ घटनास्थळी धाव घेतली. स्थानिक नागरिकांच्या मदतीने जखमींना बाहेर काढून टोकावडे येथील ग्रामीण रुग्णालयात दाखल करण्यात आले, मात्र उपचारापूर्वीच चौघांचा मृत्यू झाल्याची माहिती समोर आली. या दुर्दैवी घटनेमुळे नेवासे तालुक्यात हळहळ व्यक्त केली जात असून, कुटुंबीयांवर दुःखाचा डोंगर कोसळला आहे. (ST Bus Accident)