पुणे : विविध विकासकामांचा प्रशासनाकडे सातत्याने पाठपुरावा करण्याची आमदार माधुरी मिसाळ यांची हातोटी वाखाणण्याजोगी आहे. प्रशासनावर त्यांचा चांगला अंकुश आहे. पर्वती मतदारसंघात त्यांच्यामुळे मोठे विकास प्रकल्प उभे राहू शकले. राज्यातील शहरी मतदारसंघासाठी त्यांनी पर्वतीमध्ये केलेला विकास अनुकरणीय आहे, त्यामुळेच माधुरी पर्वती मतदारसंघातून विजयाचा चौकार मारत विजयी होतील, असा विश्वास भाजपच्या राष्ट्रीय चिटणीस आमदार पंकजा मुंडे यांनी मंगळवारी व्यक्त केला. मिसाळ यांच्या प्रचाराच्या शुभारंभाच्या पदयात्रेत त्या बोलत होत्या. जनता वसाहत परिसरात ही पदयात्रा काढण्यात आली.
यावेळी शहराध्यक्ष धीरज घाटे, दीपक मिसाळ, श्रीकांत पुजारी, अनिता कदम, आनंद रिठे, संतोष कदम, राजू कदम, सुनील बिबवे, विश्वास ननावरे, विनया बहुलीकर, महेंद्र गावडे, दैविक विचारे, श्रुती नाझिरकर, महेश बाटले, अक्षय वायाळ, बुवागिरी जीवन माने, सुधीर कुरुमकर, सुजित सामदेकर, बंडू सकपाळ, विशाल डहाळे, अमर हिंगमिरे उपस्थित होते.
दरम्यान, मतदारसंघात विविध विकास कामे आतापर्यंत मार्गी लावली असल्याने मतदार पुन्हा एकदा मला विक्रमी मतांनी निवडणुकीत विजयी करतील, असा विश्वास आमदार मिसाळ यांनी यावेळी बोलताना व्यक्त केला.
