असे किती तणाव माणूस एका पाठोपाठ एक झेलू शकतो? किती दिवस माणूस तणावाखाली राहू शकतो? तणावाचंही दुःखासारखंच आहे. डोक्यावरून जाऊ लागलं की माणूस ते ओझं फेकून देतो आणि चक्क मनाला विरंगुळा शोधतो. तेही स्वाभाविक आहे म्हणा!
मानवी मेंदूच्या सहनशक्तीला मर्यादा आहेत. 2020 साल उजाडलं आणि कोविडने दरवाजा ठोठावला. त्यावेळी कोविड खूपच अपरिचित होता. (अजूनही त्याला कुणी पूर्णपणे ओळखलंय, असं म्हणता येत नाही.) परंतु किमान जगभर संशोधन चालू आहे, लसी (छातीठोकपणे संरक्षण देत नसल्या तरी) घेतल्यात, या आणि अशा अनेक कारणांमुळे मनाला थोडी उभारी आलीये.
सुरुवातीच्या काळासारखा “जंबो लॉकडाऊन’ यापुढे लागणार नाही आणि परवडणारही नाही; परंतु मिनी लॉकडाऊन, नाइट कर्फ्यू, वीकेन्ड लॉकडाऊन असे राक्षस समोर उभेच आहेत. अजूनही लाटा येतच आहेत. नवनवीन व्हेरिएन्ट उगवतच आहेत. दोन वर्षे उलटून गेली तरी अजून कोविडच्या नवनवीन व्हेरिएन्ट्सची बारशी आपण घालतोच आहोत परंतु दुर्मुखलेलं तोंड घेऊन संकटाला सामोरं जाण्याऐवजी हसतखेळत जावं, हे बहुधा सगळ्यांना पटलंय.
करमणूक केंद्रं बंद असली तरी मनोरंजनाची गरज सर्वांना आहेच आणि ती पूर्ण केल्याबद्दल दोघांचे आभार मानले पाहिजेत. एक म्हणजे, तळहाताएवढा मोबाइल आणि दुसरे म्हणजे, दरवेळी तळहातावर तुरी देणारे आपले चाणाक्ष राजकीय नेते!
राजकीय नेत्यांनी या काळात बरंच मनोरंजन केलेलं असलं तरी त्यात “तोचतोपणा’ आणि “गांभीर्याचा विसर’ ही दोन ठळक वैगुण्यं आहेत. मोबाइल मनोरंजन करत असला तरी छोट्या स्क्रीनवर डोळे ताणून किती वेळ पाहायचं? म्हणून मग लोकांनी आपापल्या कुवतीनुसार, ऐपतीनुसार स्वतःच आपलं मनोरंजन करून घ्यायला सुरुवात केली आणि हे जगभर घडलं.
चीनमधल्या एका महिलेनं तिच्या कुत्र्याच्या वाढदिवसाला 11 लाख रुपये खर्च केले. चॅंगशा प्रांतातल्या झियांगजियांग नदीच्या पात्रावर आसमंतात “डोऊडोऊ’ या आपल्या लाडक्या श्वानाचं नाव तयार करण्याच्या “कामगिरी’वर या महिलेनं 520 ड्रोन सोडली. हा आकडा कुठून काढला असेल? चीनमधल्या मॅंडरिन भाषेत या आकड्याचा उच्चार “आय लव्ह यू’च्या जवळपास जातो, म्हणून! ते असो, बड्यांच्या बड्या गोष्टी!
सर्वसामान्यांनी काय करायचं? याचं उत्तर भारतीयांकडे आहे. दिल्लीत वीकेन्ड लॉकडाऊन जाहीर झाला आणि शंका असल्यास विचारण्याचं आवाहन पोलिसांनी केलं. एका पठ्ठ्यानं विचारलं, “”सोशल डिस्टन्स राखून, मास्क वापरून वीकेन्ड लॉकडाऊनमध्ये क्रिकेट खेळलं तर चालेल का?” कोविड-ड्यूटीनं वैतागलेल्या पोलिसांनी वैताग लपवून उत्तर दिलं, “”हा तर “सिली पॉइंट’ आहे. “एक्स्ट्रा कव्हर’ घेण्याची वेळ आलीये. शिवाय दिल्ली पोलीस “कॅच’ करण्यात पटाईत आहे…”
अशा प्रकारे तणावात विरंगुळा शोधणारे लोक सर्व आर्थिक गटात आढळतात, तसेच सर्व वयोगटात आढळतात. उदाहरणार्थ, घरबसल्या ऑनलाइन शिक्षण घेऊन कंटाळलेल्या एका विद्यार्थ्यानं न्यूटनच्या चौथ्या नियमाची लिहिलेली माहिती सध्या व्हायरल होतेय.
हा विद्यार्थी लिहितो, “”जेव्हा करोना वाढतो तेव्हा शिक्षण कमी होतं आणि करोना कमी झाला की शिक्षण वाढतं. म्हणजेच, करोना आणि शिक्षण यांचं प्रमाण व्यस्त आहे…” या बालबृहस्पतींच्या विनोदबुद्धीपुढे साक्षात करोनाही गुडघे टेकेल!