Legislative Council Election: राज्याच्या राजकीय वर्तुळाचे लक्ष लागलेल्या विधानपरिषद निवडणुकीसाठी भारतीय जनता पक्षाने आपल्या पाच उमेदवारांची अधिकृत यादी जाहीर केली आहे. पक्षाच्या केंद्रीय संसदीय समितीच्या मान्यतेनंतर ही घोषणा करण्यात आली असून, यामध्ये जुन्या निष्ठावान कार्यकर्त्यांसह नव्या दमाच्या नेत्यांना संधी देण्यात आली आहे. विशेष म्हणजे, काँग्रेसमधून भाजपमध्ये प्रवेश केलेल्या प्रज्ञा सातव यांना रिक्त झालेल्या जागेवरील पोटनिवडणुकीसाठी उमेदवारी देण्यात आली आहे. भाजपने जाहीर केलेल्या या पाच नावांमध्ये विवेक कोल्हे, माधवी नाईक, संजय भेंडे, सुनील कर्जतकर आणि प्रमोद जठार यांचा समावेश आहे. अहिल्यानगर जिल्ह्यातील तरुण नेतृत्व म्हणून ओळखल्या जाणाऱ्या विवेक कोल्हे यांच्या नावावर पक्षाने अखेर शिक्कामोर्तब केले आहे. कोल्हे यांनी कालच देवेंद्र फडणवीस आणि चंद्रशेखर बावनकुळे यांची भेट घेतली होती, तेव्हापासूनच त्यांच्या उमेदवारीच्या चर्चांना उधाण आले होते. ज्येष्ठ नेते शंकरराव कोल्हे यांचे नातू आणि माजी आमदार स्नेहलता कोल्हे यांचे चिरंजीव असलेल्या विवेक कोल्हे यांच्या माध्यमातून नगर जिल्ह्यातील राजकीय समीकरणे साधण्याचा प्रयत्न भाजपने केला आहे. विशेषतः कोपरगावमधील काळे-कोल्हे संघर्षाच्या पार्श्वभूमीवर, महायुतीचा धर्म पाळण्याचे आदेश असतानाही कोल्हेंना मिळालेली ही उमेदवारी महत्त्वाची मानली जात आहे. या यादीत कोकणातील ज्येष्ठ नेते प्रमोद जठार यांनाही स्थान देण्यात आले आहे. जठार यांच्या उमेदवारीमुळे कोकण विभागाला प्रतिनिधित्व देऊन तेथील नाराजी दूर करण्याचा प्रयत्न पक्षाने केला आहे. तसेच, अनेक वर्षांपासून पक्ष संघटनेत कार्यरत असणाऱ्या माधवी नाईक आणि नागपूर भाजपचे माजी जिल्हाध्यक्ष व विद्यमान उपाध्यक्ष संजय भेंडे यांच्यावरही पक्षाने विश्वास दर्शवला आहे. तर, पोटनिवडणुकीसाठी उमेदवारी मिळालेल्या प्रज्ञा सातव यांनी काही काळापूर्वीच काँग्रेसच्या आमदारकीचा राजीनामा देऊन भाजपमध्ये प्रवेश केला होता. त्यांच्याच रिक्त जागेवर आता त्या पुन्हा एकदा निवडणूक लढवणार आहेत. या निवडीच्या माध्यमातून भाजपने प्रादेशिक समतोल आणि पक्ष संघटनेतील निष्ठा या दोन्ही गोष्टींना प्राधान्य दिल्याचे दिसून येत आहे. 12 मेला मतदान – 12 मे रोजी या निवडणुकीसाठी मतदान होणार आहे. सकाळी 9 ते दुपारी 4 वाजेपर्यंत मतदान होईल आणि त्याच दिवशी 5 वाजता निकाल जाहीर होतील. या निवडणुकीत एकूण 9 नियमित जागा + 1 पोटनिवडणूक (एकूण 10 जागा) आहेत.