तुम्हांला गाय किंवा म्हशीचे दूध पिणे शक्य नसल्यास तुम्ही नारळाच्या दुधाचा पर्याय नक्कीच निवडू शकता. नारळाचे दूध घालून अनेक पदार्थ बनवता येतात. नारळाचे दूध कितीही आरोग्यदायी असले तरी यात फॅट्स अधिक असल्याने याचा आहारात समावेश करताना थोडा विचार करावा. परंतु नारळाच्या दुधातील पोषक घटक मिळवण्यासाठी तुम्ही नारळाच्या दुधाचा वेगवेगळ्या प्रकारे आहारात समावेश करू शकता.
फायदे
वजन घटवण्यास उपयुक्त
नारळाच्या दुधात अधिक प्रमाणात फॅट्स असले तरी हे फॅट्स मिडियम चिन्ड फॅटी अॅसिड असतात. यामुळे हे फॅट्स शरीरात चरबीप्रमाणे साचून राहत नाहीत. याउलट मेटॅबॉलिझम वाढून वजन घटण्यास मदत होते. त्याचबरोबर नारळाच्या दुधामुळे बराच वेळ भुकेवर नियंत्रण राहते.
हृदयविकारापासून संरक्षण होते
नारळाचे दूध प्यायल्याने हृदयविकाराचा धोका टाळण्यास मदत होते. नारळाच्या दुधातील फॅटी अॅसिड रक्तवाहिन्यांमध्ये प्लाकची निर्मिती करणाऱ्या बॅक्टेरियाचा नायनाट करते. यामुळे हृदयरोगाचा धोका टळतो.
सेलॉन मेडिकल जर्नलनुसार, नारळाच्या दुधामध्ये ट्रान्स फॅटी अॅसिड नसून ते ग्लुटेन-फ्री असते व यात मोठ्या प्रमाणात फायबर असते. यामुळे आपल्या शरीराचे हृदयविकारापासून संरक्षण होते. याबरोबरच नारळाच्या दुधामुळे कोलेस्टेरॉलची पातळी नियंत्रित राहून रक्तवाहिन्यांचे संरक्षण होते.
रोगप्रतिकारक शक्ती वाढते
नारळाच्या दुधामधील अँटी-मायक्रोबायल गुणधर्मामुळे रोगप्रतिकारक शक्ती वाढण्यास मदत होते. नारळाच्या दुधामधील लोरिक अॅसिडमध्ये अँटि-बॅक्टेरियल व अँटि-वायरल गुणधर्मांमुळे आजार निर्माण करणाऱ्या घटकांचा नायनाट होतो. तसेच नारळाच्या दुधात व्हिटॅमिन ‘सी’ असल्याने रोगप्रतिकारक शक्तीचे कार्य सुरळीत चालण्यास मदत होते.
रक्तातील साखरेची पातळी नियंत्रित राहते
नारळाच्या दुधात मँगनीजचे प्रमाण अधिक असल्याने रक्तातील शर्करेचे प्रमाण नियंत्रित राहण्यास मदत होते. मँगनीज आतड्यांमार्फत अन्नप्रक्रियेचा वेग कमी करून रक्तातील शर्करेच्या पातळीत अचानकपणे होणारी वाढ रोखते. त्याचबरोबर नारळाच्या दुधामध्ये रक्तातील शर्करेची पातळी नियंत्रित करण्यासाठी आवश्यक असणारे ओमेगा-6 फॅटी अॅसिड असते.
चिरतरूण दिसण्यास मदत होते
नारळाच्या दुधामध्ये व्हिटॅमिन ‘सी’, ‘इ’ आणि ‘के’ असल्याने त्वचा आणि केसांचे आरोग्य सुधारण्यास मदत होते. तसेच यामध्ये तांब्याचे प्रमाण अधिक असल्याने त्वचेची लवचिकता वाढून त्वचेवरील सुरकुत्या व सैलपणा कमी होण्यास मदत होते. त्याचबरोबर फॅटी अॅसिडचे प्रमाण अधिक असल्याने त्वचा नैसर्गिकरित्या मॉश्चराइज होते.
नारळाचे दूध बनविण्याची पद्धत –
नारळाचे दूध तयार करणे अतिशय सोपे आहे. नारळ खवून त्याचा किस गरम पाण्यात सोडावा. एक भांडे घेऊन त्यावर पातळ कपडा ठेवावा. त्या भांड्यात किस असलेले पाणी ओतावे व किस पिळून टाकून द्यावा. बाजारात मिळणारे नारळाचे दूध वारपले तरी चालेल.
दररोज 2 कप नारळाचे दूध आहारात असावे. उन्हाळ्याच्या दिवसांत थंडावा मिळण्यासाठी नारळाच्या दुधात केळे मिसळून खावे. तुम्ही नारळाच्या दुधापासून सोलकढी, सूप किंवा आमटीही बनवू शकता.
ही घ्यावी काळजी
नारळाच्या दुधाचा आहारात समावेश करताना अगोदर तुमच्या शरीरला दररोज मिळणाऱ्या कॅलरींचे प्रमाण पहा. त्यानंतर नारळाच्या दुधाचा इतर अन्नाबरोबर समतोल साधून आहारात समावेश करा.
पाण्यात मिसळलेल्या नारळाच्या दुधामुळे शरीरातील चरबी व कॅलरी घटण्यास मदत होते.