Claim killing Hamza Burhan: पुलवामा दहशतवादी हल्ल्याचा कथित मास्टरमाइंड आणि अल-बद्र या दहशतवादी संघटनेचा कमांडर हमजा बुरहान उर्फ ‘डॉक्टर’ याची पाकिस्तानव्याप्त काश्मीरमधील मुजफ्फराबाद येथे अज्ञात हल्लेखोरांनी गोळ्या झाडून हत्या केल्याची माहिती समोर आली आहे. या घटनेनंतर पाकिस्तानातील सुरक्षा यंत्रणांमध्ये खळबळ उडाली असून भारतातील कुख्यात गुंड लॉरेन्स बिश्नोई गँगने या हत्येची जबाबदारी स्वीकारल्याचा दावा सोशल मीडियावर करण्यात आला आहे. सोशल मीडियावर व्हायरल झालेल्या कथित पोस्टमध्ये, “देशाविरोधात कट रचणाऱ्यांना जगाच्या कोणत्याही कोपऱ्यात सोडले जाणार नाही,” असा इशारा देण्यात आला आहे. मात्र, या दाव्याची अधिकृत पुष्टी अद्याप झालेली नाही. पाकिस्तान पोलिस, आयएसआय तसेच भारतीय सुरक्षा यंत्रणा या प्रकरणाची स्वतंत्र चौकशी करत आहेत. हमजा बुरहान दहशतवादी घोषित – हमजा बुरहान हा २०१९ मधील पुलवामा आत्मघाती हल्ल्याशी संबंधित असल्याचा आरोप असून, भारत सरकारने २०२२ मध्ये त्याला अधिकृतपणे दहशतवादी घोषित केले होते. तो भारतीय सुरक्षा यंत्रणांच्या हिटलिस्टवर असल्याचे सांगितले जाते. या घटनेनंतर सोशल मीडियावर विविध प्रतिक्रिया उमटत आहेत. काहींनी याला पुलवामा हल्ल्यातील शहीद जवानांसाठी ‘न्याय’ असे संबोधले आहे. तर संरक्षण क्षेत्रातील तज्ज्ञांनी, लॉरेन्स बिश्नोई गँगचा दावा खरा ठरल्यास, भारतीय गुन्हेगारी जगत आणि पाकिस्तानातील दहशतवादी नेटवर्क यांच्यातील संघर्ष अधिक धोकादायक वळण घेऊ शकतो, असे मत व्यक्त केले आहे. दरम्यान, मुजफ्फराबाद परिसरात पोलिस आणि पाकिस्तानी गुप्तचर यंत्रणांनी मोठा बंदोबस्त तैनात केला असून हल्लेखोरांचा शोध घेण्यासाठी सखोल तपास मोहीम सुरू करण्यात आली आहे. भारतीय तपास यंत्रणाही सोशल मीडिया हँडल्स आणि डिजिटल पुराव्यांची पडताळणी करत आहेत. गेल्या काही महिन्यांत पाकिस्तानमध्ये भारतविरोधी कारवायांशी संबंधित अनेक दहशतवाद्यांच्या संशयास्पद हत्या झाल्या आहेत. याआधी या घटनांमागे ‘अज्ञात हल्लेखोर’ असल्याचे सांगितले जात होते. मात्र, प्रथमच भारतातील एखाद्या गुन्हेगारी टोळीने पाकिस्तानात घुसून कारवाई केल्याचा थेट दावा केल्याने सुरक्षा विश्लेषकांचे लक्ष या प्रकरणाकडे वेधले गेले आहे.