मुंबई – संस्कृतींना परस्परांशी जोडण्याचा आणि जगभरातील चित्रपट रसिकांना एकत्र आणण्याचा एक प्रयत्न म्हणून, भारत सरकारच्या माहिती आणि प्रसारण मंत्रालयाच्या अंतर्गत चित्रपट निर्मिती करणारी सर्वोच्च संस्था असलेल्या भारतीय राष्ट्रीय चित्रपट विकास महामंडळाकडून, बेलारूस, अर्जेंटिना आणि श्रीलंकेसह चित्रपट महोत्सवांच्या मालिकेचे सह-आयोजन करण्यात येत आहे.
या बहुराष्ट्र आंतरराष्ट्रीय चित्रपट महोत्सवाचा उद्घाटन समारंभ आज महाराष्ट्रात मुंबईमध्ये पेडर रोड येथील भारतीय राष्ट्रीय चित्रपट संग्रहालयात झाला. उद्घाटन सोहळ्यानंतर प्रत्येक सहयोगी देशाला समर्पित चित्रपट महोत्सव होणार आहे.
काल या कार्यक्रमाच्या पहिल्या टप्प्यात निवडक असामान्य भारतीय चित्रपटांसोबत बेलारुसी चित्रपट प्रदर्शित करण्यात आले. बेलारुस चित्रपट महोत्सवासाठी एनएफडीसीने बेलारुसमध्ये आतापर्यंत ६५० पेक्षा जास्त फीचर फिल्म्स, २००० माहितीपट आणि ३०० ऍनिमेटेड फिल्म्सची निर्मिती करणाऱ्या नॅशनल फिल्म स्टुडियो बेलारुस फिल्म या आघाडीच्या चित्रपट उद्योग आस्थापनेसोबत सहकार्य केले.
या कार्यक्रमाला बेलारुसचे मुंबईतले महावाणीज्य दूत अलियाकसांद्र मात्सुकोऊ आणि रशियन महासंघाचे कौन्सुल जनरल अलेक्साई व्ही. सुरोव्त्सेव यांच्यासोबत एनएफडीसीचे महाव्यवस्थापक डी. रामकृष्णन आणि दोन्ही दुतावासांचे इतर वरिष्ठ अधिकारी उपस्थित होते.
एनएफडीसी-बेलारुस चित्रपट महोत्सव, चित्रपटांच्या माध्यमातून परस्परांच्या संस्कृतींना जोडणाऱ्या सेतूंना प्रोत्साहन देण्याच्या उद्देशाने इतर विविध देशांसोबत ऩियोजन केलेल्या चित्रपट महोत्सवांच्या मालिकांमधील पहिला महोत्सव आहे. या महोत्सवात भारतीय आणि बेलारुसियन चित्रपट भारतात पहिल्यांदाच एकत्रित दाखवले जात आहेत, असे एनएफडीसीचे महाव्यवस्थापक डी. रामकृष्णन म्हणाले.
भारतात आयोजित होत असलेल्या या चित्रपट महोत्सवात आमचे चित्रपट प्रदर्शित करण्याची संधी मिळणारा पहिला देश असल्याबद्दल आम्हाला अतिशय आनंद होत आहे. असे बेलारुसचे महावाणीज्य दूत अलियाक्सांद्र मात्सुकोऊ म्हणाले, चित्रपट हा आपल्या हृदयाकडे आणि आपल्या मनांकडे जाणारा मार्ग आहे, असे त्यांनी अधोरेखित केले.
द लंचबॉक्स या लोकप्रिय हिंदी चित्रपटात भूमिका साकारणारी श्रुती बाफना ही अभिनेत्री या उद्घाटन समारंभात माननीय अतिथी म्हणून सहभागी झाली. या चित्रपट महोत्सवाच्या पहिल्या टप्प्यात प्रदर्शित करण्यात येणाऱ्या तीन भारतीय चित्रपटांपैकी एक म्हणून द लंचबॉक्स ची निवड झाल्यामुळे तिने आनंद व्यक्त केला. या बहुराष्ट्रीय तित्रपट महोत्सवामध्ये फिल्ममेकर्स, छाड, अॅक्रॉस द रिव्हर, द लंचबॉक्स, वेटिंग लिस्ट, सलाम बॉम्बे हे चित्रपट प्रदर्शित केले जाणार आहेत.
